بنكذب لأننا اتربينا على الكذب
طلعنا شفنا ابونا و امنا و اخواتنا بيكذبوا
و ابونا و امنا مش متقبلين اخطاءنا و دايما يعاقبونا او يصرخوا فى وجوهنا او يضربونا لو قلنا الصدق و اخبرناهم بالحقيقة
اتعودنا ان الصدق ممكن يفقدنا حب الناس و احترامهم و قبولهم لو قلنا الحقيقة المخجلة الى بنتكسف منها
اتعودنا اننا نسمع اكاذيب من الناس الى حوالينا و من الاعلام و الصحافة و محدش بيتعاقب على كدة
نكذب لاننا جبناء نخشى ان مواجه الحقيقة حتى بيننا و بين نفسنا
علشان كدة بنكذب حتى على نفسناو ساعات نصدق الى احنا بنقوله
نكذب لاننا لانملك الثقة فى انفسنا و التى تجعلنا نخشى نظرة الناس لينا لما نغلط مع ان انكشاف كذبنا هيخلى صورتنا ابشع و انيل
بنكذب لاننا نخشى ان نؤذى من نحب و نخاف ان نفقد حبه و احترامه لينا
مع ان ممكن فعلا نفقده لو انكشف كذبنا
بنكذب لان قلوبنا مليانه كره و غيظ و غل و حقد فبنحب نطلع اكاذيب تشوه صورة من نكرهه لنثبت لانفسنا انه يستحق الكره فعلا
مع ان ممكن تكون المشكلة فينا احنا و احنا الى فينا غيرة و حسد بتخلينا نكرهه
نكذب لأننا لم نتعود على قول الصدق او اتعودنا نقوله بشكل فظ و كريه يخلى الى قدامنا يزعل مننا
و المشكلة مش بتكون فى قول الصدق و لكن فى اسلوبك فى قوله
الكذب للاسف آفة اجتماعية انتشرت بشكل رهيب جعلت الجميع يفقد الثقة تماما فى الجميع و يتعامل معه بمنتهى الحذر و الشك و لا يتلقى كلامه على محمل الجد
تعالوا فى رمضان ننوى ان يتعود لساننا الصدق
و ان كذبنا كما تعودنا ان نستغفر و نتوب و ننوى تانى قول الصدق
تعالوا نرجع ثقتنا فى نفسنا تانى و نعترف باخطاءنا فاعترافك افضل عند الناس من اكتشافهم كذبك
تعالوا نرجع ثقتنا فى بعض تانى فإن الشك و الريبة اكلت العلاقات بين الناس
تعالوا نطهر قلوبنا من معصية الكذب لعل الله يغفر لنا ما تقدم من اكاذيبنا و ما تأخر وان يكتبنا من الصديقين المقربين فى هذا الشهر الكريم
آمين
ليست هناك تعليقات:
إرسال تعليق