بيكون نفسها تسمع كلمة حلوة منه
او نفسها تطمن على حبه ليها بتصرف لطيف منه
الست دايما مش مطمنة من الناحية دى
لانها حساسة اوى لاى فتور بيحصل فى العلاقة بينهم
و لان الرجال بطبعهم عطاءهم أقل
فبتكون عايزة تطمن و عندها وفى مفهومها ان الحب هو العطاء
الراجل دايما حاطت فى بطنه بطيخة صيفى و مطمن لحبها ليه لانها كثيرة العطاء
يعنى هى يوميا بتطبخ الطبيخ الى بيحبه
بتغسل هدومه و تكويها
بيتعمل كوباية الشاى فى موعدها
بترتب اوراقه و ادراجه و حاجاته
بتطمن عليه فى الشغل
فيه عطاء و رعاية يومية هى بتعملها ليه شخصيا
بتحسسه انه مطمن انها لسة بتحبه
دا غير الكلمات الرومانسية الى ممكن تقولها له
ممكن كلمات اعجاب لو هى لسانها حلو و بتقول و بتتكلم
ممكن لمسات رقيقة من القبلات و الاحضان الى هى بتبادر بيها
الراجل بيحس انه لما بيروح الشغل كل يوم هو دا العطاء اليومى العظيم الى لازم يحوز بيه على جائزة اوسكار فى العطاء
و يستوجب بأة انه يتلقى المقابل من الدلع و الرعاية و الاهتمام
الست مش بتحس بكدة
الست بتحس ان الشغل دا عطاء للاسرة كلها
مش موجه ليها هى شخصيا
و بالتالى دايما مش مطمنه لحبه ليها و علشان كدة تعد تسأله بالتصريح او بالتلميح
انت بتحبنى ؟.... بتطمن على مشاعره
هو انا تخنت ؟
رايك ايه فى القميص دا ؟
رايك ايه فى شعرى كدة ؟
طب الوان الميك اب دا احلى و الا بتاع امبارح ؟..... بتطمن على اعجابه بشكلها و نفسها تسمع كلمة غزل
ايه رايك فى الاكل النهاردة ؟ .....بتطمن على رضاه عن الاكل و عايزة تسمع كلمةشكر
انا تعبت اوى النهاردة فى الشغل او مع الاولاد ....عايزة كلمات تقدير للى بتعمله مع الاولاد
انا متضايقة اوى النهاردة من كذا .....محتاجة يقولها حبيبتى خير ان شاء الله احكيلى و يعد يسمعها و يشد من ازرها
انا كنت قلقانة جدا النهاردة من كذا ....محتاجة كلمات طمأنة و تثبيت
هى بتكون نفسها فى كلمة حلوة تطمن قلبها انه لازال على العهد
او تصرف لطيف موجه ليها هى شخصيا يحسسها انه لسة بيحبها
جايب لها حاجة بتحبها و هو جاى من الشغل ..هى بتحبها
مكالمة او رسالة سريعة يطمن بيها عليها خلال اليوم
كلمة اعجاب من غير ما تسأل بأكلها او بشكلها
اعدى انت تعبانة النهاردة انا هعمل المواعين
حبيبتى انت مشغولة مع الاولاد هقوم احضر العشاء
اى حاجة بسيطة جدا هتسعدها
مش هتكلفك اى حاجة غير شوية تركيز فى الموضوع دا و انك تحطه فى قائمة مسئولياتك
بحيث تسأل نفسك يوميا ايه العطاء ( غير الشغل ) الى انا عملته لمراتى النهاردة ؟
و لو مش فاضى يوميا يبقى اسبوعيا
خروجة حلوة
عزومة على العشا
تتسوق معاها
طبخة حلوة لو بتعرف تطبخ
انشر الغسيل المتكوم
هدية بسيطة رمزية
وقت ظريف تقضوه مع بعض من غير موبايلات
حضن من غير مناسبة
هى النساء كدة بتحب العطاءات البسيطة المتكررة
تلاقيهم دايما يهادوا بعض ...يسألوا عن بعض ...يعملوا اكلات لبعض ...يساعدوا بعض ...يتكلموا مع بعض ....يبوسوا و يحضنوا بعض
ماتعدش تقولها انا جبت لك هدية قيمة السنة الى فاتت
او وديتك مصيف كلفنى كذا الصيف الى فات
و معشيك فى مطعم فخم من شهرين
ماتعملش حاجات كبيرة مكلفة او مجهدة وتعد عليها سنين
اعمل حاجات بسيطة و غير مكلفة بمعدل يومى او اسبوعى
و كلمة اخيرة للنساء :
احساسك بالامان ينبع من داخلك انت
بثقتك فى نفسك و بقدرتك على ادارة علاقتكم بكفاءة
كل ما اكتسبت خبرة و اتغيرت للافضل فى تعاملك مع زوجك بفهمك و احتوائك ليه كل ما هتكتسبى ثقة فى نفسك اكتر
بتصرفاتك انت و عقلك و حكمتك و قدرتك على حل المشكلات و احتوائها
ثقتك فى حبه هتيجى مش بتصرفاته هو بتصرفاتك و عقلك و حكمتك انت
امانك فى هزيمة خوفك و قلقك الدائم على حبه ليك
قاومى الخوف و القلق دا بكل قوتك و لا تظهريه ليه كل شوية لانه بيوتره و بيحسسه بالاحباط و الفشل فى طمأنتك
امانك فى ثقتك فى المولى عز وجل انه لن يضيعك حتى لو كنت مش واثقة فيه فالقلوب بين يدى الله عز وجل
امانك و استقرارك النفسى خليه من جواك انت دا يكسبك ثقة فى النفس و طمأنينة اكتر
علشان العلاقة تتحسن محتاجة مجهود من الطرفين
الرجل يكثر من عطاءاته البسيطة المتتالية
و المرأة تتعلم ازاى تحتوى الرجل و تفهمه و تكون سكن ليه علشان تحس بالامان و تحس من جواها ان مفيش ست هتقدر تحتويه زى ما هى بتعمل
علشان نقدر نقرب من بعض محتاجين اننا نمشى فى اتجاه بعض خطوات مش واحد يمشى و التانى بيبعد
