قالت : اللى مزعلنى فى موضوع الجواز انى موقفى وسط الحمد لله بصلى و قيام ليل بحبه و بحاول اكون كويسه بس موقفى وسط
لبسى عادى مش شاذ و مش طرحه طويله عادى جيبه مثلا واسعه و بلوزه و طرحه قصيره
فالمتدين اووى بيبقى عايز واحده منقبه
و الولد العادى بلاقيه ميوله صياعه و انا بالنسبه له ببقى مقفله لانى مؤدبه و محترمه
يعنى يا اما متدين اووى و طبعا مش هعجبه او صايع و طبعا و لا بيعجبنى و لا بعجبه
حبيبتى :
فكرة انك تغيرى فى نفسك و شكلك و لبسك و اخلاقك علشان تعجبى الشباب دى فكرة قاتلة للذات
لازم تكونى واثقة فى نفسك ...أنا كدة و انا مبسوطة من كدة ..و عايزة الى اتجوزه ياخدنى على كدة ...ويبقى قريب من أفكارى و مستوى تدينى
تخيلى انك لبست نقاب ...و جالك واحد متدين اوى او متشدد فى ارائه الفقهية ...هتعجبيه و هيتجوزك ..لكن هيفرض عليكى كل افكاره الدينية المتشددة مش النقاب بس
و دلوقت كتير من المتشددين عندهم افكار مغلوطة من الاهتمام بالمظهر دون الجوهر و العقيدة دون السلوك والكلام دون القلب
وممكن تلاقيه ( لو مش فاهم دينه صح ) حبسك فى البيت واوجب عليكى الطاعة العمياء و حرم عليكى وسائل الترفيه وبيستخدم حقه فى الضرب و الجواز التانى بشكل متعنت كما لو انهم من العقائد و عيشك فى بيئة مجتمعية خاصة بمن مثله فى الافكار
.يعنى هتلاقى نفسك اتجوزت و مفروض عليكى أفكار انت مش مقتنعة بيها ..او حتى لو اقتنعت فترة على ان هو دا الدين ...هتلاقيه بعيد عن الدين فى امور تانية ...و هتحسى ان عنده فصام
انا بتكلم عن نماذج موجودة بكثرة فى مجتمعنا بسبب الجهل مش على المتدين الى فاهم وقارى دينه صح و عارف ان دينه اخلاق قبل مايكون لحية و جلباب
ولو بقيتى (صايعة ) على حسب لفظك هتاخدى واحد صايع ..و الصايع دا معندوش اى مشكلة فى العلاقات النسائية و شرب المخدرات و قنوات اباحية وسجاير و ممكن يجيب اصحابه يسهروا معاه و يعملوها غرزة عادى و عايز يعيش حياته بعد الزواج صايع برده .
.و يحس انك لما تعترضى على تصرفته انك متشددة و كئيبة و متزمته...و برده مش هتعيشى سعيدة
يا حبيبتى لو اتغيرت ...ممكن تتجوزى ...بس هل هتكونى مرتاحة فى جوازك ؟
هو احنا عايزين نتجوز علشان نسعد ...والا نتجوز و خلاص
لازم نفكر فيما بعد الزواج ..الزواج فى حد ذاته مش هدف
هل هذا هو الانسان الى هكون سعيدة لما أعيش معاه ..مش اى جوازة و السلام
ليست هناك تعليقات:
إرسال تعليق