مش عارف أكلم ابنى ؟

حضرتك بتقولى انى لازم ادير حوار مع اولادى ..بس انا مش ببقى عارف اتكلم معاهم فى ايه ؟

حضرتك ممكن تفتح معاهم موضوع حول الاسئلة دى

ايه اكتر حاجة ممكن تساعد بيها اصحابك ؟
دا بيلفت نظره الى ان مهم جدا انه يساعد الناس الى حواليه باى نوع من المساعدة علشان يحس بالسعادة
و بيبين لك مدى تعاطفه و احساسه بأصحابه
و ايه المهارة الى هو متميز بيها و بيساعد بيها اصحابه


لو عايز فى المستقبل تكون شخصية مشهورة ..تحب تكون مشهور بايه ؟
دا هيديك فكرة عن نظرة ابنك للنجاح و طموحه فى المستقبل
هل هو الفلوس ..هل هو المنصب ..هل هو مجرد الشهرة ..هل هو حب الناس بحيث تظبط تفكيره لو فيه غلط
الاجابة هتخليك تعرف ايه هو الحافز بتاع ابنك على النجاح و مين هو مثله الاعلى


مين هو أقرب صديق ليك ؟ و ليه ؟
دا بيديك فكرة عن مدى تأثير هذا الصديق على حياته ..فالمرء على دين خليله
خليه دايما يتعلم ان يحيط نفسه بالاصدقاء الايجابيين لانهم هيدفعوه للأمام
ويبعد عن الاصدقاء السلبيين مهما كان حبه ليهم لانهم دايما هيجروه للوراء


 لو رجعت تلات سنين فاتوا هتنصح نفسك بايه ؟
السؤال دا هيخليك تعرف هو ممكن يكون ندمان على ايه
او ايه هى الحاجات الغلط الى عملها و كان نفسه مايعملهاش و الحاجات الصح الى كان المفروض يعملها
علمه دايما ان الوقت معاه
و ان اى حاجة اتصرف فيها بشكل غلط ممكن تتعوض و تتصلح
وان اى فرصة راحت منه ممكن تتعوض برده
حاول تعالج عنده الاحساس بالندم ..لانه احساس قاتل للذات


سأل ابنك : تفتكر الطفل الآخر حاسس بايه ؟

الطفل بيبقى دايما مركز على مشاعره و رغباته و احتياجاته
لما تلفت نظره الى مشاعر الآخر
تفتكر اخوك حاسس بايه دلوقت ؟
تفتكر بابا حاسس بايه ؟
تفتكر صاحبك فى الموقف دا حاسس بايه
طب حط نفسك مكانه و حاول تتخيل هو حاسس بايه
السؤال دا بيخلى الطفل يركز على الآخر زى ما بيركز مع نفسه و يعلمه التعاطف معاه و الاحساس بمشاعر الآخرين
و دا تدريب رائع لاقامة علاقات متميزة مع الآخرين بتدريبه على الاحساس بمشاعر الناس و التعاطف معاهم و مساعدتهم كمان


 ايه اكتر حاجة فى حياتك عايز تشكر ربنا عليها ؟
السؤال دا بيوجه الولد الى نعم ربنا عليه و انه دايما يبص للحاجات الحلوة الى فى حياته و يحمد ربنا دايما عليها
بتخليه راضى عن حياته و مش بس راضى دا سعيد و شاكر لنعمة ربنا عليه


 ايه اكتر حاجة اتعلمتها و حاسس انك هتستفيد منها فى المستقبل ؟

السؤال دا بيوجه تفكيره ناحية اكتر حاجة بيحبها فيما يتعلمه ...
و اكتر حاجة حاسس ان ليها فايدة انه يتعلمها فى حياته
و هتلاقيه عايز يعرف فيها اكتر ..و اسئلته عنها دايما
و بيخليه يعرف ان الحاجات الى بيتعلمها دلوقت ممكن تكون مفيدة له فى المستقبل فبتكون دافع لحب الدراسة و التعلم
و بتديك برده اشاره لما يحبه من مجالات التعلم الى ممكن يكون ناجح فيها مستقبلا


اسأل ابنك :ايه اروع موقف حصل لك فى حياتك ؟
و ايه اتعس موقف حصل لك فى حياتك ؟
انت كدة بتلفت نظره ان الحياة فيها مواقف سيئة هتعدى و هنتعلم منها حاجة
و مواقف رائعة ايضا
اسأله اتعلمت منها ايه ؟
علشان يتعود على انه يتعلم حاجة جديدة من اى موقف بيمر عليه فى حياته
ساعات بتلاقى المواقف دى انت الى عملتها
فلو كانت مواقف سلبية ..اعتذر عما اقترفته ..فكونه فاكرهالك معنى كدة انها أثرت فيه جدا
ولو كانت مواقف ايجابية هتعرف ازاى ممكن تسعده مستقبلا لانه مش ناسيلك الموقف الحلو

‫

اسأل ابنك :ايه اكتر حاجة بتعملها بتخليك سعيد ؟
انت كدة بتلفت نظره الى سبب سعادته
و بتخليه يعرف ازاى يسعد نفسه فى اوقات الاحباط و الحزن و الالم
ويمكن الحاجة دى تحدد له مستقبله و المهنة الى ممكن هيكون سعيد فيها ..و بالتالى هيحقق نجاح فيها
فى السن الصغير اكيد هتكون ألعاب
فى السن الاكبر شوية ممكن تكون هوايات
فى سن الشباب ممكن تكون المستقبل الناجح

قل لى حبيبى خمس كلمات ممكن توصف بيهم نفسك ؟

السؤال دا هيخليك تعرف هو شايف نفسه ازاى
او شايف الناس الى حواليه شايفينه ازاى
اهتم اوى بالكلمات الى هيقولها ..كلمات سلبية و الا ايجابية
لو أغلبها سلبية يبقى عيد النظر تانى فى اسلوب تربيتك لابنك المحبط والى مخليه حاسس انه انسان سىء
لو أغلبها ايجابية و حقيقية يبقى انت تربيتك هايلة زرعت فيه الثقة فى نفسه و حاسس انه راضى عن نفسه
لو اغلبها ايجابية و غير حقيقية ...يبقى الولد عنده نرجسية خف شوية عليه من المدح و الاشادة و النفخ لانك زودتها حبتين و حاول تركز على مدح الجهد و العمل