قال : أريد أن ترتدى خطيبتى النقاب ..فكيف أقنعها بذلك ؟
أخى الفاضل :
مع كل احترامى لرغبة حضرتك بس موضوع اللبس دا من وجهة نظرى دى حرية شخصية
انت حبتها و خطبتها على ماهى عليه فتقبلها على ماهى عليه
نفرض انها رفضت لبس النقاب و لم تقتنع به فكيف سيكون موقفك ؟
هل هتقول بعد الزواج هجبرها عليه و هفرض عليها لبسه ؟
اجبار الزوج لمراته بلبس معين و فرض ذلك عليها ليس من حقه نهائى
طالما هو ارتبط بيها بهذا الشكل
ولو الموضوع دا مهم بالنسبة ليك اعلمها بيه من الآن و اشترط عليها قبل الارتباط و الزواج فالمسلمون على شروطهم ..
فان قبلت الشرط اصبحت ملزمة بيه و بتنفيذه و ان لم تقبله خلاص كل واحد يروح لحاله
ماتعدش مستحمل وضع انت مش راضى عنه على امل انه هيتغير بعد الزواج
انت ممكن تجبرها و تفرضه عليها ..بس دا هيوغر صدرها و هتحس بالقهر و الغيظ تجاهك و هينعكس دا على علاقتها بيك
كل ماهو عليك النصيحة و التحبيب و الترغيب و التعبير عن رغبتك دون اجبار
أو اشتراط ذلك من قبل الزواج علشان تكون على بينة
ثانيا : اسأل نفسك انا عايزها تلبس النقاب ليه ؟
لو عايزها تاخد ثواب ..فعلاقتها بربنا دى حاجة خاصة بيها ليس لك اى دخل فيها الا تقديم النصيحة
لو غيرة عليها عبر عن مشاعر الغيرة بصراحة و قل لها انا مش عايز حد يشوفك غيرى
اقنعها باسباب منطقية بدافع الثواب او بدافع الحب ليك او بدافع مصلحتها و حمايتها من العيون
لكن ما تخليش الموضوع دا يعمل مشاكل بينكم لان دا من الحاجات الى بتضايق المرأة
ثالثا : نقطة ازاى ماليش حكم عليها و انا هتحاسب على لبسها ؟
مين قال لحضرتك انك هتتحاسب على لبسها ؟
انت عليك النصيحة فقط
لا تزر وازرة وزر أخرى
عمرك سمعت عن الرسول صلى الله عليه و سلم والا صحابته فرض على مراته حاجة هى مش عايزاها ؟
دا الرسول لما الناس اتهمت زوجته عائشة فى عرضها و أشاعوا الافك ..حتى مكلمهاش ولا زعق و لا صرخ و الا قال لها على بيت ابوك ...
هى الى طلبت تروح بيت والدها ووافق بمنتهى الرقى
دا فقه المجتمعات الهمجية هو الى رسخ هذا المفهوم ليعطى للرجل الحق فى فرض مايريد على زوجته بدعوى القوامة ووجوب طاعة الزوجة
المرأة عزيزى انسان كامل الاهلية ..و ليس من حق زوجها ان يفرض عليها شيئا الا فيما يخص الاسرة و بما اتفق عليه من البداية
زى بالظبط مديرك فى الشركة ..هل من حقه انه يفرض عليك تلبس ايه و ما تلبسش ايه ؟
الا لو كان فيه زى رسمى معين انت متعين اصلا و عارف انه مفروض على الجميع
مع كل احترامى و تقديرى ...
القوامة مسئولية عن البيت و الاسرة و مهامها و ليست فرض لرأى الا لو شرطت عليها قبل الزواج ..يبقى من حقها تقبل او ترفض قبل الزواج
و لو مصمم على فكر الاجبار و هتدى لنفسك الحق و فاهم ان المسئولية فى نهيها عن منكر تراه بالقوة
يبقى هى كمان من حقها تنهاك عن المنكر الذى تراه منك بالقوة
(كلكم راع وكلكم مسئول عن رعيته الإمام راع ومسئول عن رعيته والرجل راع في أهله وهو مسئول عن رعيته والمرأة راعية في بيت زوجها ومسئولة عن رعيتها)
فلو الرعاية و المسئولية تعنى الاجبار ..يبقى الاجبار من الطرفين ..هو دا العدل
والطاعة الواجبة على المرأة ..هى طاعة المحب لحبيبه
طاعة الاحترام و الحب والرغبة العميقة فى اسعاده
ليست طاعة العبد لسيده ..طاعة الخائف الذليل ..طاعة المكره المجبر
ليست هناك تعليقات:
إرسال تعليق