نار الشك تحرقنى
قالت : زوجى يحبنى و العلاقة بيننا ممتازة ..و لكنى أشعر ان سكرتيرته تحبه ..و تكتب دايما على الوول بتاعها على الفيس عن انها تحب ..لكن حبها صعب المنال ..صارحت زوجى بما أشعر به فطمأننى و لكن لم يأخذ أى تصرف فى ابعادها ..فماذا أفعل ؟
غالبا الرجل لما يكون متشبع بالحب من شريكة حياته ...صعب انه يحب واحدة تانية ..و من كلامك انه بيحبك و العلاقة بينكم ممتازة
لكن الى بيحصل ان ممكن هو بيبقى محتاج ليها وشايفها انها موظفة كفء فى عملها
و ممكن للأسف يستحلى الموضوع ..يعنى بيبقى حاسس و عارف انها بتحبه و مبسوط و سعيد بهذه العلاقة حتى لو مش بيبادلها الحب ..
واحدة بتحبه و بتديله مشاعر ببلاش يرفضها ليه ...و هو مش بيغلط فى حاجة ( دا تفكير الرجالة )
المشكلة بأة لو هى اعترفت له بحبها للاسف رجالة كتير ممكن تضعف ..و يبدأ يبادلها شفقة عليها و ليس حبا ...وممكن تضغط عليه لحد ماقلبه يميل و الرجالة طبعا قلبها كبير يساع من الحبايب ألف ...و دى ممكن تحصل
قوليله تانى و تالت و رابع بنفس هدوئك ..و انت محافظة على عقلك و حكمتك ...قوليله انا تعبانة ...
انا بحاول امسك اعصابى ...بس انا ممكن انفجر و ارجوك مش عايزة حبيبى أوصل لدرجة الشك ..الشك نار هتحرقنا و تحرق علاقتنا
و الشيطان بيزين لى حاجات كتير ..و بيخلينى عايزة اجيلك الشغل ..و عايزة افتش فى الموبايل و الاوراق ...و انا بقاوم و فى صراع
انا ثقتى فيك كبيرة جدا ..و ثقتى فى حبك لى و اخلاصك كبيرة
لكنى مش واثقة فيها ..مش واثقة هى ممكن تعمل ايه
فارجوك حاول تبعد عنها علشان خاطرى .
مش بطلب قطيعة مرة واحدة
لكن بالتدريج
ارجوك ماتحرقش علاقتنا بنار الشك ارجوك
دا مش تحكم فيك ..و لا رغبة فى السيطرة عليك
بدليل ان كتير من النساء حواليك فى الشغل و لا اشعر بهذه المشاعر ناحيتهم
و لكنها مشاعرنا لاحيلة لنا فيها ..و لا نستطيع منعها ..و لكن ممكن نتحكم فى تصرفاتنا بالعقل و هذا ما اجاهد من أجله حتى الآن
لكن ساعات المشاعر بتشتعل و العقل يفقد السيطرة عليها ...
فليه نحط نفسنا فى النار و نقول مش هتحرقنا ...و فيه احتمال اننا نتلسع و نتحرق كمان ؟
ليست هناك تعليقات:
إرسال تعليق