يعنى ايه احتواء ؟
يعنى تسمع باهتمام ..تسمع وانت عقلك و نظراتك موجهة ليه ..مش تسمع و انت بتلعب فى الموبايل و الا وشك فى التليفزيون و الا بتبص فى الساعة
يعنى تسمع من غير ما تتكلم بقدر الامكان ..الا كلمات واسئلة استفسارية و ليست اسئلة محقق ..طب ليه عملت كدة ..طب مين قال كذا ...طب انت حسيت بايه..اسئلة تدل على الاهتمام
تسمع من غير مقاطعات ...هو بيبقى عامل زى واحد شايل حمل تقيل أوى و عايز يفضيه كله عندك ...المقاطعات بتخليه يقفل
تعرف بالظبط هو عايز منك ايه من خلال كلامه ؟
هل عايز مجرد فضفضة يليها شوية طبطبة و تعاطف
والا عايز يستشيرك أعمل ايه علشان تبادر بالحلول و النصايح و الاقتراحات
لاحظ فى آخر كلامه
لو عايز استشاره هيقولك طب اعمل ايه ؟
لو محتاج طبطبة مش هيقول السؤال دا ..
فلا تتبرع بابداء النصائح والرأى الا اذا سألها
لاتصدر احكام ...لاتقل انت غبى ..انت عبيط ..انت انانى ..انت ...انت ...
لاتنتقد و تقول انت غلطان ..استمع فقط
لا تلومه و تعاتبه ..كدة برده تعمل كذا؟ ...انت ازى تعمل كذا ؟
لا تقارنه بحد ...متعدش تقوله دنا مشكلتى ألعن من مشاكلك ..دا انت مشكلتك هينة جدا دنا حصل عندى كذا و كذا
و الا فلان حصل له كذا كذا و علان حصل له كذا و كذا ..ماتزودش همه
فقط استمع و استمع و انت مهتم
لو هو غلطان فى حاجة ...ماتقلش الا بعد ما يهدأ و تحس انه ارتاح
المرأة الى عندها القدرة دى بيكون زوجها زوج سعيد ...لأن أقصى مايحتاجه الرجل من زوجته هذا الاحتواء (السكن )
الرسول صلى الله عليه و سلم عندما نزل عليه الوحى وكان فى منتهى الخوف و التوتر ماراحش لعمه الى بيحبه ..راح لزوجته خديجة
و لما تلكأ المسلمون فى اطاعة امره فى صلح الحديبية عندما امرهم بالتحلل من احرامهم وكان فى منتهى الغضب ..ماراحش لصديق عمره ابو بكر ...راح لزوجته أم سلمة
ولما حدثت حادثة الافك وكان الرسول فى منتهى الحزن و الألم ذهب رسول الله الى زوجته زينب بنت جحش ياخد رأيها فى ضرتها عائشة
الزوج الى مش لاقى فى مراته الاحتواء خلاص بيقفل تماما منها و معدش بيشاركها مشاكله و احزانه و همومه و يبقى كتوم و ماتعرفش عنه حاجة
و الرجل كمان الى عنده القدرة دى ...بتكون زوجته أسعد زوجة فى العالم ..
فاقصى ماتريد المرأة هو هذا الاحتواء و الانفتاح الآمن و انها تفضى كل الى قلبها و عقلها مع شريك حياتها من غيرما تلاقى عاصفة هوجاء
ليست هناك تعليقات:
إرسال تعليق