مهما الخطيبين مثلوا على بعض
بس اكيد بيظهروا على حقيقتهم فى المواقف المختلفة
مواقف الغضب ...لو واحد بيفقد اعصابه و بيقول كلام بذىء و يصرخ ...وهو خاطب و ماسك نفسه و بيمثل .....أمال بعد الجواز هيعمل ايه ؟
لو واحدة طول النهار تفكيرها فى جبت ايه و جبنا ايه .و انت عليك كذا و بابا هيجيب كذا و هتجيبلى هدية ايه وهتفسحنى فى مطاعم شيك و الشبكة و المهر و القايمة العربية و الشقة و كلامها كله فى الماديات و الطلبات المادية ...
يبقى دى واحدة مادية و هيبقى همها بعد الجواز نفس همها قبل الجواز
لو واحد بتاع بنات و اكتشفت انه بتاع بنات و قالولك انه بتاع بنات و هو شخصيا قالك انه بتاع بنات ..ما تضحكيش على نفسك و تقولى هيتصلح بعد الجواز ....
محدش بيتصلح بعد الجواز ..أغلبهم بيتأندلوا اكتر بعد الجوازإلا من رحم ربى و قليل ماهم
لو واحدة طول النهار تقولك ماما بتقول كذا و ماما عايزة كذا ..و ماما قالت لى كذا ...و المهم عندها كلام مامى و رغبات مامى ...فدى باينه من اولها انك لازم تتجوزها هى و مامى ..يا اما هتبقى ايامك سوووودة
لو واحد طول النهار يقولك مش معايا فلوس ...و مقدرش اجيب ..و مقدرش اعمل ...و بعدين تكتشفى انه جايب لوالدته كذا ...و جايب لاخته كذا ...و جايب لصاحبه كذا ...يبقى الجواب باين من عنوانه انك هتكونى دايما فى آخر الاولويات فى حياته ...
المفروض الطبيعى مرة و مرة على الاقل يبقى فيه توازن
لو واحدة عايزاك دايما تنفذ رغباتها و تتخانق و تزعل لما ما تعملش الى هى عايزاه و تعد تأنبك لو بتحبنى كنت عملت كذا فى اى موقف بتختلفوا فيه ..
دى واحدة معندهاش استعداد تتنازل عن رغباتها ...و هتفضل معاك كدة ....المفروض الطبيعى يكون مرة و مرة يبقى فيه توازن
لو واحد بقاله تلات اربع سنين بيتنطط من شغل لشغل و مش عارف يثبت فى شغلانه واحدة لانه بيتخانق مع اصحاب الشغل او مش مرتاح فيه دا هيفضل كدة و هتشيلى انتى غالبا المسئولية المادية لو بتشتغلى
لو واحدة طول النهار تقولك أمك بتعمل و أمك بتقول و أمك ماعملتش و أمك عملت يبقى تعمل حسابك ان هيبقى فيه مشاكل خطيبتك مش هتحبها و تقع فى دباديبها بعد الجواز
لو واحد طول النهار يقولك أنا عايز لما نتجوز تعمليلى كذا و تسويلى كذا و تطبخيلى كذا و تدلعينى و تهشتكينى و تنيمينى و تصحينى و تأكلينى و تشربينى و طول النهار يطلب فى طلبات و عمره ماسألك و انت ياحبيبتى نفسك فى ايه بعد الجواز..او حتى نفسك فى ايه دلوقت ؟
دا واحد عايز واحدة يمتلكها و تبقى متفانية فى اسعاده و عمره ماهيدور هو على سعادتها
صدقونى كل حاجة بتبان قبل الجواز
بس احنا للاسف الى بيبقى على عينينا غشاوة
و فاكرين انه هيتغير بعد الجواز
و يمكن جهل بسبب صغر السن و ضعف الخبرة
و ساعات الأهل عايزين نكمل الجوازة باى طريقة ...المهم الاتنين يتجوزواو بيبقوا شايفين المشكلة بس مطنشين
جزاكِ الله خيرًا كلامك صحيح
ردحذفكل شيء يكون واضح في البداية لكنهم يغضون الطرف في سبيل إكمال الزواج بأي شكل وكأنهم يأسوا من كرم الله في ارتباط أفضل