التدرج فى معالجة الاخطاء

الكثير من الاباء و الامهات التربية عندهم مجرد ردود افعال لتصرفات الطفل الخاطئة

يعنى كل الى بيعملوه ان لما الطفل يخطىء يقولوا دا غلط ..هى دى التربية فى منظورهم

فطول النهار الام تلقى بالاوامر و تنبه على الاخطاء
ماترميش الشنطة كدة
ما تقلعش الجزمة هنا
ما ترميش هدومك كدة
ما تتكلمش بالطريقة دى
ما تاكلش بالطريقة دى
ما تطولش فى الحمام
ما تعدش على الموبايل

الطفل الى طول النهار والدته بتقول له لاتفعل ..طفل بائس بالفعل

أولا بيفقد الثقة فى نفسه و يتصور انه طفل خاطىء ..ان هو نفسه غلطة
بيكره نفسه و بيحس انه ولد غير صالح

مع الوقت بيكره والدته الى دايما بتديله الاحساس انه غلطان علطول و كل تصرفاته غلط

بياخد رد فعل واحد من اتنين :

اما انه يعند و يكبر دماغه و معدش يسمع كلامها نهائى لانه كدة كدة خلاص مش ممكن هترضى عنه و يعلن التمرد

او انه يستجيب و يبقى شخصيته ضعيفة جدا و ماشى على التعليمات و مايعرفش يعمل اى حاجة الا لما يتأكد من ماما انها مش غلط الاول ...
ودا طبعا بيعجب الامهات جدا و بتقول عليه ولد هادى و بيسمع الكلام

بس دا بعد كدة هيكون انسان جبان لانه خايف من اى خطوة يعملها فى حياته لاتطلع غلط ..حتى جوازه و شغله و طموحه ماما الى بتنقيها احسن يغلط

اعدى مع نفسك
و اكتبى فى ورقة كل التصرفات الى مش عاجباك فى ابنك
كل الاخطاء الى بيعملها
و بعدين رتبيهم على حسب الابشع فالاقل بشاعة
و ركزى على اصلاح واحدة واحدة
ادى لنفسك شهر مثلا لاصلاح اول خطأ بالاقناع و الحب و ترسيخ المبدأ و التكرار و البرمجة

بلاش تمشى على التوازى و عايزة تصلحى كل الاخطاء مرة واحدة لانك كدة مش هتنجزى اى حاجة
امشى على التوالى ..لما نخلص من غلط ندور على التانى ..

علشان نحافظ على علاقتنا باولادنا و نحافظ على ثقتهم فى نفسهم و نصلح نظرتهم ليها