كل الشباب عايزين يتجوزوا ....و دا طبيعى جدا انك تتشرك الحياة مع انسان بتحبه و يحبك
لكن هل هتأجل سعادتك و نجاحك لحد ما ترتبط
يعنى هو ما ينفعش تحس بالسعادة و انت single
كل مرحلة من حياتنا و ليها سعادتها ..
مرحلة الطفولة ليها سعادتها
مرحلة المراهقة ليها سعادتها
و مرحلة السنجلة برده ليها سعادتها ..لو أحسنا استغلالها صح
و بصينا للجوانب الايجابية فيها
و سعادتها بتكون فى الحرية
الحرية فى مجتمعنا بتكون من نصيب الولد اكتر
و الحرية مش هتحصل و انتى قاعدة فى البيت منتظرة العدل و كل الى فى البيت بيتحكموا فيكى ..
والا قاعدة على الفيس تصطاد العرسان
انزلى اشتغلى ..و لو مش لاقية شغل
انزلى شاركى فى عمل تطوعى خدمى
دا هيحسسك بانك اكتر حرية بدل حبسة البيت
سعادتها فى النضج النفسى و عدم الاحتياج المزمن للآخرين
النضج النفسى انك تنضج من مرحلة الاعتماد على الآخرين نفسيا الى الاستقلالية و الاعتماد على الذات
و دى مرحلة مهمة لتستمتع بعد كدة بالشراكة و التعاون مع شريك الحياة و ما تبقاش اعتمادى عليه
البنت او الولد غير الناضج دايما معتمد على الاخرين ..و خاصة على بابا و ماما فى تلبية رغباته و احتياجاته المادية و المعنوية
بتلاقيه مش عارف يعمل حاجة لازم بابا يشجع ..و لو ماشجعش مش هتتعمل
عايز يجيب حاجة ماما أو بابا الى بتجيب
متضايق بابا الى يطبطب و يدلع أو ماما
بيطلع راجل ابن مه ..او بنت مش مفطومة
الاعتمادية دى لما تستمر و تترمى على شريك الحياة بعد كدة بتكون نقطة ضعف فى العلاقة بتسبب مشاكل كتير و خاصة ان لم يستوعبها و يحتويها شريك الحياة
فيه فرق بين انك تتجوز علشان المشاركة و السعادة مع بعض و انكوا بتحبوا بعض و عايزين تكملوا حياتكم مع بعض ..
و انك تتجوز علشان محتاج ..محتاج حد يخدمك ..محتاجة حد يصرف عليكى
محتاج تطفىء شهوتك ..محتاجة حد يبقى مسئول عنك و ياخدلك قراراتك
انتهز فرصة السنجلة للنضج النفسى ...واتعلم عدم الاحتياج
و على رأى أحدهم : انا ممتن لكل من طلبت مساعدتهم و قالوا لا ...لانى قدرت انى أعملها بنفسى
سعادتها فى عدم المسئولية
انك تكون مسئول بس عن نفسك و مش شايل هم حد تانى (شريك حياة و اطفال و بيت و الوسط الاجتماعى بتاع شريك حياتك (أهله و اصحابه و شغله )
سعادتها فى قدرتك على تحقيق انجازات اكاديمية بانك تكمل دراستك و تطور نفسك بالدورات و كورسات و تطوير المهارات
او تحقيق انجازات عملية ...انك تحقق اهدافك و تحقق نجاحات فى حياتك
سعادتك فى ان قرارك بيكون نابع من ذاتك ...
وهى دى الحرية المسئولة و الممتعة ..وقتك ملكك وحدك ...حياتك انت صاحب القرار فيها
سواء كان قراراتك ناجحة او فاشلة فانت بتتعلم من قراراتك ...و بتتعلم من الحياة و بتنضج
سعادتك فى التمتع بالصداقة
الصداقة من غير جواز بتكون ممتعة جدا ...و خاصة لو كلكم سناجل مع بعض
و لا فيه واحد مراته هتعكنن عليه لانه قعد معاكم
و لا فيه واحدة متجوزة هتخاف من انك تحسديها على الهنا و النعيم الى هى فيه ..او تخاف منك تخطفى جوزها smile emoticon
نظرة المجتمع
و نظرات الشفقة عليكى
و الكلمات الحشرية ( مفيش حاجة جديدة ..مش هنفرح بيك بأة )
و نظرات الخوف منك من المتزوجات
دى كلها أمراض اجتماعية متفشية على الكل ...محدش بيسلم منها
يعنى نظرات الشفقة هتيجى و انت حامل فى التاسع و ماشية مش عارفة تاخدى نفسك
و الا وانتِ مجرجرة وراك اطفال صغيرين وشايلة واحد على قلبك
و الحشرية هتيجى برده ( مفيش بيبى جاى فى السكة ....طب مش هتخاويه بأة ...هو جوزك بيقبض كام فى شغله ...هو انتى طالخة ايه النهاردة ) يعنى الحشرية طايلاكى طايلاكى و مش هتترحمى منها
اما نظرات الخوف هتقلب لنظرات غيرة منك من المتزوجات لو حلوة شوية او لبقة شوية او ذكية حبتين
سيبك من كل دا و استمتعى بحياة السنجلة ..فهى مرحلة جميلة لو استغليناها و استمتعنا فيها بجد
و لعلمك يعنى لو قدرتى تعيشى سعيدة و انت سنجل هتقدرى تعيشى سعيدة و انت متجوزة ...لان السعادة منحة ربانية مصدرها العقل و القلب و الروح ..مش الظروف
ليست هناك تعليقات:
إرسال تعليق