قالت : زوجى بيعرف بنات على الانترنت ...و يقسم بالله انه يحبنى و عمره ماحب غيرى ؟
حبيبتى للاسف فيه رجالة كتير فى عالمنا العربى معندهاش رابط بين الحب و الاخلاص
يعنى بيحبك و بيموت فيكى ..بس ليه ما اتكلمش مع غيرك ؟
ليه ابقى بتاعك انت بس ؟
قلبه كبييييير يساع من الحبايب ألف
وكان رأى أحدهم : بحب المانجة و أموت فى المانجة ...بس مش معنى كدة انى ما اكلش تفاح و موز و فراولة
رجالة كتير فى عالمنا العربى عندهم التفكير دا للاسف الشديد
و ساعات بيكون زهقان و بيعملها تسالى ...زى أزأزة اللب و السودانى كدة
على رأى احدهم الى بيقول لمراته : انت الحب و هم التسالى
و ساعات بيكون عايز يعيش الحب تانى ..الحب الملهلب بتاع الافلام ..و الى ممكن يكون عاشه معاك فى الاول ..لكنه هدأ مع المسئوليات
او انه اتجوز جواز تقليدى و لم يشعر بالحب ...فحبه ليكى حب عشرة
و ساعات و دول -الشباب- الى فوق الاربعين... بيبقى عايز يحس ان لسة فيه الرغبة و انه لازال جاذب للنساء و عايز يعيد الثقة فى قدراته
و ساعات بيكون رغبة فى الاثارة و التحدى ..بالذات لما يلاقى واحدة الكل ينشد ودها و هو عايز يدخل فى منافسة علشان هو الى يكسبها و يحس بنشوة الانتصار
و ساعات بيكون حب للكلام الجنسى ..هو عايز يتكلم و انت بتتكسفى مثلا من الكلام دا ..او هو حاسس انه لو اتكلم معاك كدة هيسقط من نظرك مثلا فبيبدأ يتكلم مع واحدة تانية
الاسباب كتير ...و نفسيات الرجال مختلفة
و احنا محتاجين نصبر عليهم لحد ما ينضجوا و يكبروا و يقدروا يتحكموا فى رغباتهم و شهواتهم ...
.زى صبرك على ابنك الى بيعمل بيبى لحد ما يتحكم فى نفسه
انت عارفة ان نضج المرأة أسرع من نضج الرجل
بس عايزاكى تكونى متأكدة انه فعلا بيحبك ...و ربنا يفرغ عليكى الصبر يارب
ليست هناك تعليقات:
إرسال تعليق