أحد أسباب التعاسة الذاتية ...... التوقعات المستمرة من الآخرين ...أو بمعنى آخر العشم أتوقع من أمى انها تعمل كذا فى الموقف الفلانى
أتعشم من اخويا انه يتصرف بالشكل الفلانى فى الموقف الفلانى
أتوقع من جوزى انه يعمل كذا لما يحصل كذا
أتوقع من ابنى انه يتصرف بشكل معين فى الموقف المعين
أتوقع من صحبتى انها كانت تعمل كذا لما كنت كذا
و لما ألاقى الآخرين لا يتصرفون بالشكل الى أنا توقعته ...دا يصيبنى بالضيق و الهم و أشعر انهم مش بيحبونى
التوقعات دى هى تصرفك انت فى الموقف الفلانى و دا ناتج عن خبراتك و ارائك و نظرتك للمواقف و مش لازم علشان هى نابعة منك ...تكون التصرف الطبيعى للاخر المختلف عنك فى خبراته و و اراؤه و رؤيته للموقف
يعنى لما أكون عيانة ..اتوقع من صديقتى انها تتصل بى تطمن على ..علشان انا بعمل كدة ..
لكن مش لازم صديقتى يكون دا رد فعلها ممكن هى شايفة ان مرضى بسيط و لا يستاهل القلق
يمكن هى متعودة انها تتصل بعد يومين تلاتة
يمكن تقول خليها نايمة النهاردة ترتاح مش هزعجها
ممكن تكون انشغلت بحاجة مهمة خلتها ما تتصلش
تفكير الناس و اولوياتهم و طريقة تصرفاتهم مختلفة عننا ....
مش لازم أفرض عليهم يتصرفوا ازاى و مش لازم ازعل و اكتئب لما يتصرفوا بشكل مخالف لما توقعته و مش لازم ألومهم و اعاتبهم لما يخيبوا املى و رجائى ...
لان اللوم و العتاب بيحسسهم بالتقصير و يؤذيهم
التوقعات دى فى مخى أنا ....مش لازم تكون فى مخ الناس
التوقعات دى تصورى انا ....لكن تصور الناس مختلف
التوقعات هتسبب لى الألم و الكآبة ....و هتسبب نكد للآخرين لما أعد ألومهم و اعاتبهم .فبلاش منها خالص
ليست هناك تعليقات:
إرسال تعليق