النساء تعتقد انها بدال بتصلى الصلوات الخمس يبقى كدة أدت حق ربها خلاص
و بتصوم فى رمضان و بتقرأ ساعات قرآن يبقى عداها العيب
طب و لو في أيام الحيض ربنا مالوش حق خلاص ؟؟؟؟؟؟ !!!!!!!!!
أنت عزيزتى خلقت من جسد و روح
و زى الجسد ماله حق الأكل و الشرب و النوم و اللبس علشان تحافظى عليه ولا يموت الروح محتاجة تغذية و ليها طلبات برده يا اما هتموت
تغذية الروح فى دوام تواصلك مع نافخها و موجدها ...تستمدى منه الطاقة الروحية الى تخلى روحك دايما عايشة ..و مش عايشة بس دى روح ترتقى و تعلو
انت محتاجة لتواصل يومى مع ربنا سبحانه و تعالى ...مش بالصلاة بس لاننا ممكن كتير جدا بنصلى و تكون صلاتنا مجرد حركات للجسد ...لم تتصل فيها الروح بالخالق
و زى مافيه وسائل تواصل عديدة بين البشر دلوقت ..التليفون و الانترنت و التليفزيون و الفيس و الفايبر و الواتس اب و غيره ..و بتلاقيكى غالبا بتفضلى واحدة فيهم عن التانية و بترتاحى فيها
فيه وسائل تواصل مع ربنا كتير جدا ...محتاجة تجربيها و تكتشفى بالظبط ايه اكتر وسيلة بتقربك لربنا اوى و بتحسى فعلا انك اخدت طاقة روحية عالية تحسسك بهدوء النفس و سكينة القلب و هدأة الضمير
انت كمان محتاجة تتعلمى كتير فى دينك ...اقرئى لو غاوية قراءة ..اتفرجى لو غاوية يوتيوب ...اسمعى لو غاوية خطب
فى ثوة المعلومات ...الجهل لم يعد حجة نقف بيها أدام ربنا و نقول له اصل كنا مانعرفش لو انت يوميا حطيت لنفسك نص ساعة يوميا لتتعلمى شيئا ما فى دينك ...هتستفيدى و هتفيدى
و من أجمل ما يشجع على التعلم أن تتعلم وتعمل على ايصال ماتعلمته للآخرين
يعنى لو عرفت حاجة جديدة ...و كتبتيها على الفيس بشكل مبسط ....هيثبت العلم فى مخك و هيفيد الناس كمان
مجالات العلم الشرعى عديدة : القرآن و تفسيره ...عيب عليكى تكون واخدة شهادة أد الدنيا و لسة مش عارفة معنى آيات فى كتاب الله
الحديث و شروحه ...عيب عليكى برده تكونى بتقولى انا بحب رسول الله صلى الله عليه و سلم و لسة ما قرأتيش رسالته ليكى انت
السيرة ...عيب تكونى غاوية قصص و روايات و لسة لم تقرأى سيرة احب الناس اليك ...كما تدعين ...قراية السيرة بتخليكى فعلا تحبيه زى ما بتحبى شخوص رواياتك
الفقه ..و لا انصحك بيه فى البداية لان فيه خلافات كتيرة و بيلخبط
تزكية ..كتب الرقائق والتهذيب و هى من اروع المجالات الى هتأثر فيكى و هتخليكى تنتبهى لقلبك
العقيدة ..المبسطة ولا انصحك برده تغوصى فيها اوى يكفيك مايصحح عقيدتك
يبقى احنا علشان نؤدى حق ربنا لازم (علم و عمل )
اتعلمى حاجة جديدة ...و اعملى حاجة تقربك من ربنا و تمنحك الطاقة الروحية اليومية و دا مش هياخد منك اكتر من ساعة فى اليوم ...
المهم نحطها فى بؤرة الاهتمام لانها سعادتك فى الدنيا بسعادة الروح و سعادتك فى الآخرة أيضا :)
ليست هناك تعليقات:
إرسال تعليق