من الحاجات الى تزود الثقة فى النفس انك تحط أهداف لحياتك و تحققها
مش لازم تكون اهداف كبيرة ..انك تكون مليونير
مش لازم تكون أهداف عظيمة ..انك تصلح الكون
مجرد انك بتحط هدف مهما كان بسيط و انك قدرت على نفسك و تغلبت على كسلك و عجزك و قدرت انك تحققه دا بيديلك ثقة فى نفسك كبيرة
على سبيل المثال :
الناس الى بيعانوا من الهرجلة و الفركشة و مش منظمين فى حياتهم بطبعهم
الموضوع دا بيعمل لهم ازمة كبيرة فى ثقتهم فى نفسهم
لانهم علطول شايفين نفسهم مهملين
و الناس دايما تنتقدهم بسبب الطبع كدة
فتكسير الذات بييجى من الداخل و الخارج
مش لازم تعمل حملة فى يوم على حجرتك مثلا ...و بعدين تسيبها تتفركش تانى يوم
فتت المهمة الكبيرة الى مهام صغيرة و حط كل يوم هدف صغير
النهاردة هرتب المكتب و اتخلص من الورق الزيادة
و بكرة هرتب دولاب الملابس و اتخلص من الهدوم الى مش بلبسها
وبعده هرتب التسريحة و اتخلص من علب الكريمات الناشفة و الاكسسوارات المكسرة و ازايز البرفانات الفاضية
ست البيت الى حاسة دايما ان شغل البيت عليها هم كبير و فشلت انها تحافظ على نظام و نظافة بيتها
قسمى البيت على مدار الاسبوع و كل يوم اعملى حاجة
يوم لحجرة النوم
يوم لحجرة الاولاد
يوم للحمامات
يوم للصالة
يوم لدواليب المطبخ
يوم لسيراميك المطبخ و الارضيات
و الجمعة أجازة :)
لما هتلاقى الحجرة نضيفة و مرتبة مش هيهون عليكى تتفركش تانى و هتحاولى تحافظى على ترتيبها فى بقية اليوم
و هيبقى الاسبوع القادم اسهل من الاسبوع الحالى
مجرد انك تحطى هدف و تنجزيه دا بيحسسك بالانجاز و النجاح انك قدرتى تحققى حاجة
حط لنفسك دايما اهداف صغيرة و بسيطة و قابلة للتحقق
ماتقوليش عايزة انزل وزنى عشرة كيلو ...قولى عايزة انزل كيلو واحد الاسبوع دا
ماتقوليش عايزة اجيب غسالة اطباق ب2000 جنيه ...قولى هحوش 100 جنيه من مصروف البيت الاسبوع دا
ماتقولش عايز افتح مشروع خاص بى والى هيتكلف 10000 جنيه
قل هدخر الشهر دا 1000 جنيه
الاهداف الكبيرة ..فككها الى اهداف مرحلية صغيرة
لما الهدف يكون صغير أدامك وتحققه دا بيديك ثقة فى نفسك كبيرة انك تقدر ..و على المدى البعيد هتقدر تحقق اهدافك الكبيرة
ليست هناك تعليقات:
إرسال تعليق