انك تكون عايز من شريك حياتك حاجة ..او متوقع منه حاجة
فتبدأ تختبره و تشوفه هيعمل ايه فيها ..و بعدين تحكم عليه بعدها ان معندوش احساس أو مش بيحبك
او انك تبقى عايز حاجة ..و تطلب حاجة تانية خالص مالهاش علاقة بالاولانية
قلة المصارحة بين الطرفين بتقلل ثقتهم فى بعض مع الوقت و بتخليهم يحسوا انهم مش قادرين يفهموا بعض و بتعمل مشاكل كتييييرة أوى
على سبيل المثال :
عيد ميلادى بعد يومين أما أشوف هيفتكره و الا لأ
بابا دخل المستشفى أما نشوف هيقف معانا و الا لأ
انا قلتله نفسى فى الشنطة الفلانية لما خرجنا المرة الى فاتت اما اشوف هيجيبها لى و الا لأ
أمى مريضة أما أشوف هتقولى تزورها تعمل لها البيت النهاردة و الا لأ
أمر بأزمة مالية مفاجأة لما أشوف هتساعدنى هى و أهلها و الا لأ
أنا مسافر فى شغل أما أشوف هتعرف تشيل البيت و الا لأ
و طبعا كل واحد فيهم يعد ينتظر التانى يفهمها و هى طايرة ..و محدش فيهم بيفهم ..و يزعل لما مايعملش المتوقع و يتقمص
طالما لم تتكلم بصراحة لا تنتظر أبدا من حد انه ينفذ رغباتك الى ماخرجتش برة مخك
و بعدين تزعل و تغضب لما ما ينفذش الى انت ما قلتوش أصلا
و ياسلام كمان لما تكون عايز حاجة و تتخانق على حاجة تانية خالص ..و دى مصيبة تانية
متضايق ان زوجته مشغولة عنه فيزعق على القميص الى مش مكوى
متضايق انها طنشته وهو يأمل فى علاقة حميمية فيعد يسخر من شكلها و تخنها
متضايقة انه ما عبرهاش فى عيد جوازهم فتعد تتخانق على حماتها الى كلمتها بشكل وحش
متضايقة انه مابيقلهاش كلمة طيبة فتتخانق على مصروف البيت
الموضوع دا بيعمل ارتباك شديد فى العلاقة و بيخليهم هم الاتنين مش فاهمين بعض ...و هم الاتنين حاسين ان التانى مش فاهمهم
ساعات كتير هو مش فاهمك لانك مش صريح معاه
الصراحة بتوجد التفاهم مع الوقت ..و لما ييجى الموقف تانى و يتكرر هيعرف انت عايز ايه تحديدا من غير ما تقوله تانى غالبا
حاول دايما تبنى علاقتك مع شريك حياتك على الصراحة و الوضوح من أول يوم
فيها ايه يعنى لما تقوليله برقة و ذوق انا عيد ميلادى بعد يومين و اتمنى انى اصحى الصبح ألاقى مفاجأة منك
والدتى تعبانة و اتمنى انك تروحي لها تساعديها النهاردة لو انت فاضية ..رجاء مش أمر
انا بتضايق جدا لما ادخل البيت و الاقيكى مشغولة مع الولاد و لا كأنى جيت و اتمنى انك تستقبلينى
انا بتضايق جدا لما اعمل لك حاجة حلوة و انت ماتقلش اى كلمة طيبة فيها و اتمنى انك تقول على الاقل تسلم ايدك
خليك صريح ..بس بذوق و هدوء ..و من غير لوم كتير ..و من غير ما تجرحه ..الصراحة فى العلاقة مهمة علشان تقدروا تفهموا بعض مع الوقت ...و تقدر تتوقع هو عايز ايه من غير مايطلب
لكن هتفضلوا كل واحد يتوقع و يزعل و يتقمص و التانى مش فاهم ليه
دا أمر بيهدم العلاقة مع الوقت
ليست هناك تعليقات:
إرسال تعليق