الانسان الواثق فى نفسه لايلوم الآخرين
فيه ناس طول ماهى قاعدة مفيش فى تفكيرها إلا لوم الآخرين على حياتها
يلوم أبوه أنه غصب عليه كلية مش بيحبها أو شغلانة مش عايزها
يلوم أمه انها جوزته بنت مش بيحبها او جوزتها راجل مش بتحبه
بيلوم حبيبته انها ماصبرتش لحد مايكون نفسه او تلوم حبيبها انه محاربش الدنيا علشان خاطرها
يلوم صحبه انه مجابلوش شغلانة كويسة فى الخارج و تلوم صحبتها انها ماوقفتش جنبها فى محنتها
تلوم جوزها انها مكملتش تعليمها و يلوم مراته على فشله فى شغله
لوم ...لوم...لوم
طول ما انت قاعد تلوم الآخرين ..طول ما انت حاسس انك زى العروسة فى مسرح العرايس وكل واحد حواليك ماسك خيط و بيحركه
او عامل زى الريشة فى مهب الريح ...الريح تيجى شمال تروح شمال ...تيجى يمين تروح يمين و انت مش قادر تسيطر على حياتك ..
و بالتالى بتفقد ثقتك فى نفسك مع الوقت
توقف حالا عن لوم الآخرين و عن لوم نفسك أيضا ...لان اللوم مش هيغير الواقع الى انت وصلت ليه ...
اللوم هيتعبك و هيخليك تكره و تغضب من الانسان الى بتلومه و تكره نفسك انك اعتمدت عليه فى قراراتك
قل لنفسك :
نعم هو ضغط على علشان كذا ..بس انا باراداتى الى استجبت له ...
يعنى دا ارادتى و قرارى انى اسمع كلامه ...
محدش فى الدنيا يقدر يجبر حد على حاجة هو مش عايزها
و انا سمعت الكلام و دا كان قرار خاطىء منى أنا
و لن ألوم نفسى أيضا على سلوك الطريق دا لأنى كنت قليل الخبرة و العلم صغير فى السن ساعتها ومش هقدر أغير الماضى
بس أنا بارادتى ممكن أغير الحاضر و المستقبل
اقعد مع نفسك ..و فكر فى حياتك دلوقت حالا
تخيل حياتك بعد 10 سنين عايزها تكون ازاى ..
على كل المستويات الشخصية و الاجتماعية و المهنية
ماتعدش تقول عايز ولادى يكونوا كذا ..ماتحطش اهدافك فى حد تانى حتى لو اولادك ..لان ولادك غير مسئولين عن تحقيق اهدافك ..و لانك
هتكرر نفس الى حصل مع والديك ..
انت نفسك عايز تكون فين و تعمل ايه ؟
حط نقطة و من أول السطر
اقلب صفحة الماضى و ركز على الحاضر
ماتقلش انا مش عايز كذا ..ركز على الى انت عايزه
و حط خطوات عملية للوصول الى ماتريد
و خد أولى الخطوات
وكلما خطوت خطوة نحو المستقبل زاد احساسك بالثقة فى نفسك
لكن طول ما انت قاعد تندب حظك و تلوم الآخرين مش هتتحرك من مكانك
ليست هناك تعليقات:
إرسال تعليق