سألت : رأى حضرتك ايه فى التعليم المنزلى؟
بصراحة لم اقرأ عن الموضوع كتير و معنديش فكرة بيمشى ازاى و لا قرأت دراسات عنه
بس انا بقول ان المدرسة دى مش الهدف منها بس التعليم
المدرسة هى التدريب على الحياة بالنسبة لاولادى
بيتعلم فيها مهارات اجتماعية و نفسية مهمة جدا لنموه و تطوره
بيواجه مشاكل ....طب ما هو دا تدريب ليه على مواجهة المشاكل فى حياته فى المستقبل
هيتعامل مع اطفال وحشين ..ماهو دا تدريب ليه انه ازاى يعرف الناس الوحشين فى حياته بعد كدة و يعرف يتعامل معاهم ازاى
فيه فساد فى المدرسة ....كويس جدا علشان يعرف الفساد الموجود فى المجتمع و ازاى يواجهه و يتجنبه
بيختلط بطلبه فاسدين ممكن يفسدوه ...لو حتى اتفسد دلوقت سهل جدا انك تأثر عليه فى سن صغيرة غير لما يجرب الفساد دا لما يكبر و يبقى صعب تمنعه منه
فيه مدرسين منحلين اخلاقيا ...كويس علشان يفهم و يعرف ان مش اى حد كبير هسمع كلامه و امشى وراه و لازم اوزن اعماله بالصح و الغلط مش علشان هو كبير
هعمل ايه لو ابنى انساق للحاجات دى ؟
انسياق الابن معناه ان شخصيته ضعيفة و بيتأثر من الى حواليه
او شخصية مغامرة و جريئة و دى حاجة كويسة بس عايزة ترشيد بالعقل
التأثير علي الطفل فى الصغر اكبر سواء بالسلب او الايجاب
يعنى لو شاف صحبه بيشرب سيجاره و هو فى ابتدائى و جربها مرة و انت كلمته و اقنعته انها غلط هيتأثر
احسن ما يعملها و هو فى ثانوى و سن المراهقة و العند و تأثيرك عليه بيكون أضعف مايمكن
يا جماعة
لازم الاطفال يعرفوا ان الحياة فيها الوحش و الحلو
و فيها الفاسد و الصالح
و فيها موبقات كتيرة و فساد كبير
و ادوهم الفرصة انهم يعملوا بعض الاخطاء علشان يتعلموا
ولا تقلق على ابنك لدرجة حبسه و تحجيمه و منعه
القلق هيكون موجود اكيد
بس طالما علاقة الابوين بالابناء ممتازة و فيه ثقة و احترام بينهم
و انت بتدعيله
و هو شخصية عنده ثقة فى نفسه
يبقى غالبا ربنا هيحفظه
لكن لو هترمى ولادك فى المدرسة و عامل حسابك انهم بيتعلموا و بيتربوا فيها لوجدهم من غير ماتكون عامل علاقة وطيدة معاهم فلا تلومن الا نفسك
و لو هتحجر عليهم فى البيت و تعزلهم عن المجتمع وتخاف عليهم هيبقى الخطر عليهم مضاعف لما يواجهوه فى الكبر
لانهم اما هيتصدموا تماما و يكرهوا عيشتهم و ينعزلوا عن الدنيا
يا اما هيخوضوا فيها بكل ما فيها فى وقت يصعب عليك التأثير
ليست هناك تعليقات:
إرسال تعليق