مش عايزة أهز صورة والده

قالت : الولد بيعمل غلط والده بيعمله
ازاى اصلح غلط الولد من غير ما اهز صورة أبوه

فكرة ( هز صورة الاب ) دى محتاجة مراجعة فى تربيتنا لاولادنا

اولا : مهم تأكدى للاولاد على فكرة ان مفيش حد فى الدنيا معصوم من الغلط
احنا كمان كاباء و امهات غير معصومين و بنغلط
الغلط غلط و الصح صح
حتى لو صدر من الاب او الام او المعلم او الجد او الجدة او اى حد كبير لان كل الناس بتغلط

دا بيغرس فيه القيمة و المبدأ و الصح و الغلط
واننا نعمل الصح و نتجنب الغلط حتى لو الدنيا كلها بتعمله
بيغرس فيه تقديس المبدأ و ليس الاشخاص

ثانيا : الغلط لا يجعلك تفقد احترامك ليه
لان بالطريقة دى محدش هيبقى محترم فى الدنيا دى لان كلنا بنغلط
الاحترام الواجب بين الناس و بعضها و بين الاباء و الابناء ملوش دعوة بالغلط الى بيغلطوه

ثالثا : ركزى كمان على اعترافك انت باخطائك لما تغلطى و اعتذارك ليهم لو الغلط فى حقهم
لو شتمتى او زعقتى او ضربتى او اتكلمت بشكل لايليق
اعترفى انك اخطأت دا برده هيربى فيهم الصح و الغلط و يعلمهم الاعتذار بدل البحث عن حجج و حد ترمى عليه المسئولية

رابعا : للاسف لما الام تعد تبرر للاولاد اخطاء ابوهم او تعد تبرر اخطاءها ( انتوا الى جننتونى و انتوا الى غلطانين و انتوا ....و انتوا......)
بيتعلموا التبرير و عمرهم ما هيعترفوا بغلط ارتكبوه ابدا
و لما بيكبروا خلاص بيعرفوا ان الى انت بتعمليه دا غلط مهما حاولت تتجملى او تجملى ابوهم

امبارح كنت قاعدة مع اولادى و بنفتكر الذكريات
قعدوا يفتكروا (العلق ) الى اخدوها منى و هم صغيرين
اعتذرت و حضنتهم و بوستهم و قلت لهم سامحونى كنت ايامها جاهلة و معرفش و معنديش بدائل
الاعتراف بالحق فضيلة
علشان نعلمها لاولادنا لازم اول احنا نتعلمها