قالت : يعني اسيبوا عادي وهوا بيعمل غلط قدام الناس منبهوش ولا اكلموا ؟
طبعا احنا بنتعرض لضغط كبير لما اولادنا يغلطوا ادام الناس
بنكون محرجين منهم جدا اكيد
و ممكن كمان الناس و خاصة الاهل يتبرعوا بالكلام الجارح ..
و بالخصوص حماتك و أمك و تعد تنتقد تربيتك و فشلك فى تربيته وانك مدلعاه
فدا بيخليكى تقومى عليه تبقى عايزة تاكليه ....
علشان يقولوا عليكى انك أم مية مية و تنولى رضاهم السامى
و ساعات جوزك يقولك قومى اتصرفى مع ولادك ..و يكون مكسوف منهم
طبعا الكلام دا بيجننك
و ياسلام كمان لو حد شخط فيهم و الا زعق لهم و الا عنفهم و الا ضربهم ...هتبقى مصيبة سودا على دماغهم ..اما دماغ طفلك ..او دماغ الى زعق له و ممكن تكون خناقة كبيرة و زعلة
طب أعمل ايه فى المواقف دى ؟
احنا اتكلمنا قبل كدة عن الاستعدادات للزيارة و هتكلمى ابنك قبلها
القاعدة بتقول (احترمى ابنك ) ..حتى و هو بيتعاقب
العقاب بالزعيق و الشتيمة تؤلمه جدا لانها اهانة ادام الناس
خدى ابنك فى اودة لوحده ...
و كلميه بينك و بينه مش ادام الناس ..
وفكريه بالعقاب و الكلام الى اتقال و احنا لسة فى البيت و قوليله لو اتكرر الغلط هتتعاقب هنا
لو اتكرر
هتدخليه فى اودة لوحده و يتعاقب بالعزل ..
طالما انت مش قادر تحترم الناس ...و ماتزعلهمش ...
يبقى تعد فى الاودة ما تتنقلش منها
ولو صغير اوى ماينفعش يقعد لوحده ..او ممكن يخرب حاجة ..تقعدى معاه لمدة محددة ..مثلا نص ساعة
لا تهتمى كثيرا لكلمات امك و حماتك ...مع كل احترامنا ليهم بالطبع
بس هم شخصيات مختلفة ..و المجتمع كان مختلف ..و احنا كنا مختلفين
كونى واثقة من نفسك
و قوليلهم بمنتهى الثقة (بدون تحدى ) و بمنتهى الاحترام
مع كل احترامى ليكى يا ماما و مع كل احساسى بفضلك فى تربيتى و تربية زوجى ...بس انا بحاول اربى دلوقت بالعلم
احنا فى عصر العلم ...و علم النفس الطفولة بيقول ان الطفل لازم يغلط
و ان التربية الصح من التربية الغلط بتعتمد على تعاملك مع الغلط دا ..
و العلم يقول كذا
لما بتلاقيكى بتتكلمى بشكل علمى تماما
و تلاقيكى كدة فاهمة وواعية و متعلمة وعارفة انتى بتعملى ايه
هتحترم رأيك و هتقدر الى انتى بتقوليه
ولو مش قادرة تعملى كدة يبقى قللى الزيارات ..التكرار و المدة ..طالما مش هيقدروا يستحملوا الاولاد ..و قوليلهم كدة
معلش انا الولاد بيتدلعوا لما ييجوا عندكم و انا مش بعرف اسيطر عليهم ..فانا هقلل علشان انتم بس ما تضيقوش
احترمى اولادك أدام الناس
علشان هم كمان يتعلموا يحترموكى أدام الناس
ماتعديش تشكى منهم و تقولى غلطاتهم للناس ..و هم بيسمعوك
ماتعديش تزعقى و تضربى و تشتمى أدام الناس
ماتعديش تتريقى عليهم و تسخرى من كلامهم الصغير أدام الناس
احترمى اولادك ..علشان يطلعوا ناس محترمة تحترم الآخرين
ولو انتى فعلا متعلمة تربية صح ..هتكونى واثقة من نفسك
و مش هتتحرجى ادام الناس
لان كل الاطفال بيغلطوا
ومش هتحسى ان دليل فشلك كمربية
هتحسى ان دا امر طبيعى ..لكن تميزك فى انك تتعاملى معاه ازاى
ليست هناك تعليقات:
إرسال تعليق