زوجى بيعرف ستات كتير جدا ...وممكن يصل الامر الى انه بيتجوزهم عرفى مقابل المال ...أنا تعبت خلاص ...فماذا أفعل ؟
انا لا اتعجب ابدا من هذا الرجل ..لانى عرفت الكثيرون مثله
و لكنى اتعجب من امرأة ترسل لى رسالة (أعمل ايه ) بعد عشر سنين و الا 15 سنة جواز و هو على حاله
فيه منهم رجالة حريصة على بيتها ...بيحب مراته و بيحاول يسترضيها بكلمتين حلوين ..أنا مقدرش استغنى عنك .. ..انت الزوجة و الحبيبة و دول مجرد تسالى ...انت ..انت ..انت ...
و ممكن يكون فعلا بيحبها لكن شهوته و غريزته اقوى من انه يتحكم فيها و يسيطر عليها ..و ممكن يكون مريض نفسى بالفعل
و دا أفضل من التانى الى صراخ و اهانة و ضرب و هجر بالشهور و طرد من البيت و .....و.....
بصراحة الست الى كدة بتكون ست جبارة انها بتقدر تستحمل هذا الوضع طوال هذه السنين
بس انا بستغرب هى جاية دلوقت تشتكى ليه ؟
طالما أخدت القرار من البداية انك هتستحملى ..يبقى لازم تكونى أد القرار دا و تتحملى تبعاته
لكن مش قادرة تستحملى دلوقت بعد السنين دى كلها ...يبقى تاخدى قرار جديد و تتحملى برده تبعاته
هذا الداء صعب جدا على اى امرأة التعايش معاه ..لان مفيش حاجة ممكن تطعن امرأة فى انسانيتها و ثقتها بنفسها زى الخيانة ...حتى لو جواز ..
فهو بالنسبة ليها خان ثقتها فيه ...خان حبها و تضحياتها ..خان العشرة و يمكن الفلوس الى استأمنته عليها
هى استأمنته على نفسها و حياتها ..يعنى اعطت له الامان انه هيحافظ عليها وانها هيكون ليها وحدها ...
و هو مش قادر يحافظ على نفسه من أجلها
المشكلة كمان انه لا يحترمها و يديها حرية القرار
هو بيعمل كل حاجة من وراها ..و بعدين تكتشف فجأة .و دى خيانة للثقة كبيرة
الراجل الحقيقى بيكون شجاع و يقول لها انا عايز اتجوز أو اصاحب ستات ...
و انت لك كل الحرية فى اختيار العيشة معى على هذا الامر .
.أو التسريح باحسان ..
دا الراجل الى معدش موجود فى الوجود دلوقت ..الى مايقبلش على نفسه انه يعيش مع واحدة هى مش طايقاه
وبدال قبلت انها تتحمل طول السنين دى ..دا بيزيدها ضعف و فقدان لذاتها و احترامها لنفسها و بتبقى خلاص فقدت اى قدرة على عمل اى حاجة فى حياتها ..المرأة و خاصة لو كانت وقفت جنبه كتير و ساعدته كتير بتحس بالضياع
عزيزتى :
مش هقدر أقولك تعملى ايه ..لانك خلاص فقدت القدرة على عمل أى حاجة و اتخاذ اى قرار فى حياتك ...
سامحينى مش هقدر اساعدك باى حاجة ...غير انى اقولك ..بصى لنفسك شوية و بطلى تفكير فيه
ليست هناك تعليقات:
إرسال تعليق