عصبية الامهات لها اسباب كتير
ممكن هى اصلا شخصية عصبية من قبل ماتتجوز ....ودى محتاجة تدريب متواصل لنفسها على التحكم فى تصرفاتها و كلامها .
لان الزوجة العصبية بتكون غالبا فاشلة فى زواجها و تربيتها لاولادها
و بيكون البيت علطول عامل زى ساحة معركة ....لايمكن تنعم فيه بالهدوء و السكينة ...ومحدش مرتاح فيه لا الزوج و لا الاولاد
انا شخصيا بانصح الشباب بعدم الاقتران بالشخصية العصبية لو اكتشفها قبل الزواج
و دايما بقول لما هى عصبية و انفعالاتها غير مضبوطة قبل الزواج و مسئولياته ...أمال هتعمل ايه بعد الزوج ؟
و ممكن تكون العصبية نتيجة مسئولياتها كزوجة و أم ....ودا بتحصل لكل النساء بعد الزواج ...لكنها بتحصل فى فترات الضغط الشديد
خناقة زوجية و خصام
ولادة طفل جديد و ملبوخة بيه
دخول الطفل المدرسة و بداية المذاكرة
الانتقال الى مكان جديد
يعنى العصبية بتحصل مع التغيرات و على فترات
أحد الاسباب المهمة الى بتزود عصبية الامهات انها مش منتبهة ابدا لنفسها ..ولا تهتم بفكرة التخفيف من الضغوط ابدا
بيعجبنى جدا الاجانب فى انهم عايشين حياتهم مع مسئولياتهم ...
و دايما مهتمين بوسائل اسعاد انفسهم ...زى اهتمامهم بمسئولياتهم كموظفات و امهات وزوجات
علشان كدة الام الاجنبية اقل عصبية و اقدر على حمل الاثقال من الام العربية ...و الأم المصرية بصراحة أفشل واحدة فيهم على الاطلاق
علشان كدة تلاقيها دايما مضغوطة و عصبية و بتزعق ومتضايقة و بتشتكى وتورث هذا الامر لابناءها ...
و قاعدين نطلع اجيال عصبية و انفعالية ووصلوا الى درجة السفالة و الشتيمة و قلة الادب الى مش بلاقيها فى الدول العربية التانية
حبيبتى
اهتمى بنفسك ..مايعديش يوم الا لما تكونى مدلعة نفسك بحاجة تسعدك
اهتمى بمزاولة انشطة تخفف الضغوط عنك و تخرجك من حالة الكآبة الى انت عايشاها
بدل ما انت واقفة فى المطبخ طول النهار و الليل ...وبدل ما انت ماسكة الفون بالساعات .....روحى لمراكز التجميل ..روحى لصالات رياضية ...اتفقى مع اصحابك فى خروجة ترفيهية ...اركبى عجل ... روحى مرة حمام سباحة و بلبطى ...العبى كورة مع اولادك فى حديقة عامة
محدش يتحجج ان مفيش فلوس او مفيش وقت
قللى مصروفك فى الاكل و الهدوم و روحى فسحى نفسك و ابسطيها
فيه حاجات كتير ممكن تعمليها مش محتاجة فلوس
اى تغيير و كسر لروتين الحياة هيساعدك على التخفف من المسئوليات
اهتمى باعصابك و خرجى الضغوط علشان يبقى عندك قوة احتمال اكتر
ليست هناك تعليقات:
إرسال تعليق