أولا : سيبه يعتمد على نفسه فى خدمه نفسه و مذاكرته و مشاويره حل مشاكله اتخاذ قراراته
توقف تماما عن الاحساس الدائم انه صغير و مش هيعرف
الرجالة زمان كانوا بيتجوزا فى سن 18 سنة و كان بيبقى راجل مسئول وجدع
كل ماكان اعتماده عليك أقل وبيحس انك واثق فيه كل ما بيحس انه واثق فى نفسه و قدراته اكتر
ثانيا : اشبع ابناءك من المدح و التشجيع و اظهار الاعجاب بشكلهم و اخلاقهم و تصرفاتهم علشان يحسوا انك شايفهم دايما كويسين
نظرة الاطفال الى انفسهم تعتمد اساسا على نظرتك انت ليهم
طول ما انت مش شايف الا الغلطات الى بيعملها و العيوب الى فى شخصيتهم عمرك ما هتنقل لهم انهم كويسين
ثالثا : عود اولادك على الخشونة
مش لازم الاكل كل يوم طبيخ ...ممكن ناكل فى يوم عيش و جبنة
مش لازم اللبس كل عيد جديد
مش لازم كل توصيلة بالعربية ..عودهم يركبوا المواصلات
مش لازم لما يقولوا جعانين ...يتوفر الأكل فى الحال
مش لازم توفر ليهم كل وسائل الراحة و الرفاهية ...
الدنيا محتاجة ان عودهم يقوى علشان يقدروا يعيشوا فيها
رابعا :ازرع فى نفوسهم الهمة و الطموح و الامل
اجعلهم دوما يفكرون فى المستقبل و ماذا يريدون ؟
هتجيب كام فى الامتحان بكرة ؟
ناوى تجيب مجموع كام فى الترم دا ؟
ناوى الماتش بتاع بكرة هتجيب كام جون ؟
ناوى فى المسابقة تطلع الكام ؟
ناوى تطلع ايه ؟
ناوى تطلع زى مين ؟
قدرتهم على وضع اهداف و آمال و طموحات و تحقيقها ....
و ايمانك بيهم انهم هيقدروا يحققوها و توصيل الاحساس دا ليهم ....
بتزرع جواهم الثقة فى نفسهم جدا
خامسا : ازرع فيهم الاحساس بان ربنا معاهم ..يؤيدهم و ينصرهم و يحفظهم
علمهم حسن التوكل على الله (احفظ الله يحفظك ..احفظ الله تجده تجاهك )
علمهم اللجوء الى الله لو صادفتهم المشاكل و العقبات مع الأخذ بالاسباب ( اذا سألت فاسأل الله و اذا استعنت فاستعن بالله )
علمهم الرضا بما صارت اليه الامور ( واعلم أن الأمة لو اجتمعت على أن ينفعوك بشيء لم ينفعوك إلا بشيء قد كتبه الله لك)
وان يتعلموا من اخطائهم ({مَا أَصَابَكَ مِنْ حَسَنَةٍ فَمِنَ اللَّهِ وَمَا أَصَابَكَ مِنْ سَيِّئَةٍ فَمِنْ نَفْسِكَ} ...لتدارك الاخطاء و المحاولة مرة أخرى حتى الوصول لاهدافه
.......................
لو انت ايها المربى مش واثق من نفسك أصلا ...
فازرع الثقة اولا فى نفسك كى تزرعها فى ابنائك
او اعترف بالخلل لابنائك حتى يتجنبوه و مايطلعوش زيك
ليست هناك تعليقات:
إرسال تعليق