يلعب الطفل مع ابن الجيران
ويأتى باكيا مزعورا لأمه
فلان أخد منى لعبتى
تاخده فى حضنها و تطبطب عليه و تاخده من ايده و تروح معاه للطفل الى اخد لعبته ..
و تعد تحايل فى الولد و تقوله انت اخدت لعبة ابنى ليه ..
او تشخط فيه و تنهره وتاخد منه اللعبة و تديها لابنها بمنتهى الحب ..فيفرح الطفل و تنتهى المشكلة
و لما يكبر و يروح المدرسة
لو حد شد شعره تروح تهزأ امه
لو حد داس له على طرف تروح تتخانق مع المدرسات
تلاقيها مقيمة فى المدرسة الحارس الامين
تنقى له اصحابه ..و تقعده فى المكان الى هى عايزاه
و تعمل له الواجب
و تعد تذاكرله لحد ما يبقى شحط فى ثانوى و مش عارف يذاكر الا لو ماما قاعدة جنبه
وطبعا مش بيمد ايده فى اى حاجة فى البيت ..وهى لازمتها ايه يعنى غير خدمته و رعايته
و لما يكبر شوية و يتخرج من الكلية ....يواجه بمشكلة الشغل
تلف على المصالح و الشركات و تكلم طوب الأرض علشان تجيب له شغل
او تصرف فلوسها و الى وراها و الى أدامها علشان تعمل له مصلحة يشتغل فيها
و يمكن تخليه يشتغل مع باباه فى نفس الشغل و يستمر انفاقهم عليه
و بعدين الشاب حيلة أمه عايز يتجوز ..تعد هى بأة تنقى و تدور
و تخليه يخطب دى و من اول مشكلة يسيبها و انا اجوزك ست ستها
و تجيب ست ستها ..
و يتجوزها الرجل الهمام بناء على رغبة امه ..
حتى لو هو مش مقتنع بيها و لا بيحبها
و يجيبها بأة خدامة لست الحبايب
و طبعا المشاكل الزوجية الى بينه و بين مراته.. مامته برده هى الى بتحلها بمعرفتها
لو اتقدم ليكى واحد من النوعية دى اتفرجى عليه و هو قاعد جنب مامته
مين الى بيتكلم ؟
مين الى بيقرر؟
مين الى هيدفع المهر و يجهز الشقة و يجيب العفش ؟
لو لاقيتيه مصدر ماما فى كل الاتفاقات
لو لقيتيه اى مشكلة بينكم تلاقى ماما الى جاية تحلها
لو لاقيتيه بيتكلم عن ماما كتيييير اوى و بيذكرها فى القاعدة اكتر من خمس مرات
لما تسأليه تلاقى ماما هى الى بتعمله كل حاجة و عمره مابعد عنها ولا يوم و هو باشا فى البيت ماما بتخدمه أو اخواته البنات
لو سألتيه انت ماسافرتش الشغل برة ليه أو ما درستش الدراسة الى كنت بتحبها ليه ...يقولك علشان خاطر ماما
طب انت ماحاولتش تطور نفسك ليه و تستقل بحياتك ...أصل ماما ماتقدرش تبعد عنى
دا مش اسمه بر بماما ....دا اسمه سيطرة ماما على حياته
البر مش معناه انها تمشيلى حياتى ابدا ابدا
البر هو حسن التعامل بالخلق و الذوق و الادب ..و اقناعها بقراراتى بمنتهى الحب و الرفق و اللين
وانى اكون مقتنع تماما ان رضاها عنى مش معناه انها تمشينى على مزاجها فى حياتى
ياحبيبتى
لو واحد فيه كل الصفات دى .أو أغلبها ..من البداية كدة اخلعى
و ياعزيزى
لو حضرتك كدة ...يبقى ارجوك بلاش تتجوز ...و خليك قاعد جنب ماما و عيش تحت رجليها علشان تنول الجنة ..بدل ما تجيب زوجة تتمرد على الوضع دا و تدخل بظلمها جهنم ..و امك كمان تدخل جهنم ..و تعد تحت رجليها فى جهنم
ماهو يعنى مش كل الامهات هيدخلوا الجنة ..دا اغلب أهل النار من النساء
ليست هناك تعليقات:
إرسال تعليق