تقدم لى عريس المرة ديه على خلق وملتزم وسنه صغير وشكله مقبول وعيلته كويسة
مشكلته انه مش بيشتغل
نزل من السعودية وسايب شغله ولسه هيدور على شغل
مافيش شقة وعاوز نعيش ايجار جديد
معهوش فلوس ومحدش هيساعده من اهله والشبكة هيحاول يجبها
الطبيعى انى ارفض لكن الفكرة اللى بفكر فيها ان اهم شىء انى عنده دين وعنده خلق وسنة مناسب ليا وده مش بلاقى كتير فى اللى اتقدموا وبقول الرزق بيد ربنا وان شاء الله يفتح علينا
بفكر صح ولا غلط ؟
والله حبيبتى حسب طبيعة شخصيته
فيه شخصيات كويسة جدا خلقا و دينا لكن للاسف انفعالية فى شغلها ..يعنى اى مشكلة تحصل فى الشغل يسيبه..
معندوش قدرة على انه يستمر فى شغلانة واحدة
و بيقعد يتنطط من شغله للتانية (مش من مكان للتانى ) يعنى بيشتغل حاجات مختلفة ..ولايحقق اى نجاح فى أى واحدة و دا خطر
..لانك هتعانى معه ماديا
و ممكن يطلب منك انك تشتغلى انت علشان يتنطط براحته و يقعد فى البيت فترات طويلة بدون شغل علشان لسة بيدور و هو مش حاسس بضغط
الشخصية دى بتكون غير مسئولة و معندهاش قدرة على الصبر علشان تنجح و تتطور و تتقدم ..
معندهاش قدرة على احتمال ضغوط اى شغل لانه مسئول عن بيت و اسرة ...هو بيسيب الشغل و ربنا هو الى بيرزق
الشخصية دى لا انصح ابدا بالارتباط بيها لانها غير مسئولة و زى ما هيبقى غير مسئول ماديا هيبقى مكبر دماغه معنويا و نفسيا
و فيه شخصية صبورة و حمولة و عايز ينجح و يتقدم و بيطور نفسه و بيتعلم جديد و يكتسب خبرات و ممكن يتنقل لكن لشغل أفضل و لفرص أفضل
ودايما بيدور على الافضل
ودا الى انت تقفى معاه و تشجعيه و تستحملى فقره و ضيق ذات اليد لان مسيره هيلاقى نفسه و هينجح لانه طموح و صبور و مسئول
اسأليه عن تاريخه فى الشغل
وخليه يحكيلك عن الشغلانات الى هو اشتغلها و ليه بيسيب الشغل ..
لو حسيتى انه بيعمل مشاكل (ملوش خلق على مشاكل الشغل ) ..
لو اشتكى ان هم الى مشوه (يعنى مش ناجح فى شغله )
و دايما يرمى باللائمة على اصحاب العمل ..فدا امر غير مطمئن
غالبا بيتقدم لبنت بتشتغل و بيبقى مصمم على انها تستمر فى الشغل
وحكاية مش معاه فلوس دى مقلقة برده
طب مستعجل ليه على الجواز ؟
امال كان قاعد فى السعودية بيعمل ايه ؟
الشباب الى بيروحوا يشتغلوا علشان يحوش تكاليف الزواج على الاقل الشبكة مثلا .طب كان بيودى فلوسه فين ؟
الموضوع لازم تستفسرى عنه كويس
فى النهاية
لو اتقدم لبنتى عريس معدم
انا عندى استعداد اساعده و اقف جنبه بشرط انه يكون مجتهد فى شغله فعلا و يحتمل مشاكله و بيطور نفسه علطول و عنده طموح واقعى مش خيالى و عنده اهداف صغيرة ممكن بيحققها
فدا هيكبر بالمساعدة
لكن واحد غير مجتهد فى شغله و دايما عامل مشاكل و دايما يتطرد منه
و لا بيطور نفسه و طموحه خيالى و لا يتناسب ابدا مع قدراته
و لا يحقق اى اهداف صغيرة (الشبكة مثلا ) فدا خسارة فيه المساعدة
لانك مهما ساعدته مفيش منه رجاء و مش هيتصلح
ليست هناك تعليقات:
إرسال تعليق