قالت : ليه فيه انسان بيحبنا أوى و انسان تانى بيحبنا نص نص ؟
الحب مشاعر ..و المشاعر بتكون لا ارادية تماما ...هى بتيجى كدة لوحدها من غير ماتكونى واعية لاسبابها
وعلماء النفس و علماء الطب النفسى و العقلى و الادباء و الشعراء و الفلاسفة على مر العصور و الازمان بحثوا كثيرا عن أسباب الحب و حاولوا يفسروا ليه الانسان دا بنحبه و التانى لأ ..
و قالوا فيها تفسيرات كتيييرة جدا جدا ....هنقول بعضها
فيه ناس بتقول الحب متعلق بحبك الاول و انت طفل ..الأم او الأب أو المربى الى اتأثر بيه الطفل ..و لما بتلاقى انسان شبه امك او والدك شكلا او موضوعا ( سلوكيا و اخلاقيا ) و انت بتحبيهم اوى او واحد فيهم بتحبيه اوى زيهم
وفيه ناس قالوا ان كل واحد فينا عنده احتياجات نفسية ناقصة نتيجة التربية الغلط غير المشبعة ..يعنى واحد كان عنده نقص فى الحب ..واحد تانى كان فى الحنان ...واحد كان عنده نقص فى الاحترام ..واحد كان ناقص اهتمام ...واحد كان عنده نقص فى العلم و المعرفة ...واحد كان عنده نقص فى الايمان ...و أول ما يلاقى واحد يديله النقص دا بيحبه اوى و يتعلق بيه
و فيه ناس قالوا ان كل واحد على مدار حياته بيرسم صورة فى خياله للانسان الى بيحبه ...بيبقى مجموعة صفات هو بيعجب بيها جدا سواء صفات شكلية او اخلاقية و اول مابيلاقي الواحد الى صورته قريبة من الى فى خياله بيحبه اوى
و فيه ناس قالوا ان الحب بييجى نتيجة افرازات كيميائية معينة بتحصل مع ناس معينين مش لاقيين لها تفسير نفسى ..و دا الحب الى بيحصل من اول نظرة
و الرسول صلى الله عليه و سلم قال لنا ان ربنا لما بيحب عبده بيحبب فيه اهل السموات و الارض
و الرسول عليه الصلاة و السلام بيقول برده : (الارواح جنود مجندة ماتعارف منها ائتلف و ما تناكر منها اختلف ) ...
يعنى بتلاقى واحد تقولى عليه روحه حلوة ..و تلاقى التانى تقيل على قلبك بدون اسباب واضحة ومن أول لقاء
يعنى اى انسان فى الدنيا هتلاقى ناس بتحبه و ناس مش بتحبه و دا عادى جدا
الرسول صلى الله عليه و سلم الذى اجتمعت فيه كل صفات الجلال و الجمال الانسانية ...كان فيه ناس مش بتحبه ..و ناس بتكرهه لدرجة انها ارادت قتله
لن يحصل انسان على حب كل الناس ..بس ممكن يحصل على حب أغلب الناس
ليست هناك تعليقات:
إرسال تعليق