دكتورتى الحبيبة
انتى عارفة طبعا انى متجوزة من سبع سنين بعد قصة حب طويلة
وازاى كنت بشتكيلك من فتور الحب بعد الزواج و الانجاب والغربة
و كان عيد الحب بيمر على يوم حزين ..
ابكى فيه على الحب الى ضاع
و اقعد زى عبلة كامل مربعة اتفرج على الحبيبة و المخطوبين و الهدايا الحمراء فى المحلات و اعيط
النهاردة افتكرت كلمتك لى السنة الى فاتت
لما قلتيلى ليه مستنية جوزك يجيب هدية والا دبدوب و الا وردة
قومى انتى هاتيله الهدية و اعملى الجو الرومانسى الى انتى عايزاه و نفسك فيه
قررت امبارح انى لازم احيى الحب تانى و اعمل بنصيحتك
نزلت اشتريت ملاية سرير حمراء عليها قلوب و ورود تحفة
و جبت ورود و نشرتها على السرير
و ورود علقتها فى كل مكان فى اودة النوم
و اشتريت وردة حمرا لزوجى و كتبت عليها اهداء رقيق
و اشتريت لنفسى فستان احمر و توكة حمرا وشبشب احمر كمان
و اباجورات حمراء
انا ناوية النهاردة انى اعيد يوم من ايام الرومانسية بتاعت أول الجواز تانى
ومش هنتظر هو الى يعمل
حسيت بسعادة كبيرة و انا باشترى الحاجات دى امبارح
و حسيت بسعادة و انا بتخيل اليوم النهاردة هيكون ازاى
وهعمل بنصيحتك و هدى الاولاد مضاد الهستامين الى بينيمهم علشان يناموا
وناوية بأة كمان أشغل موسيقى مع عطور فى الأودة و كدة يعنى
ادعيلى يا دكتورة
ادعيلى يكون رد فعل زوجى ظريف و لطيف و يتبسط و يتفاعل معايا كدة و يحسسنى بحبه
اصل انا حساسة اوى لاى رد فعل محبط
انا عايزة بس اقولك ..ان كلمة السنة الى فاتت لزقت فى مخى و جابت مفعولها
................................
حبيبتى :
ربنا يسعد قلبك يارب كم اسعدتينى
و يسعد قلبك برغبتك فى اسعاد زوجك
و ربنا يهديه يارب و يكون رد فعله ظريف و لطيف
وانا بقول له من دلوقت
يا حسن ...أحسن الله اليك يارب
بلاش الكلمات المحبطة الهى ربنا يكرمك
بلاش ايه الهبل الى انتى عاملاه دا
بلاش جبتى الحاجات دى كلها بكام
بلاش والله انتى ست فاضية
حاول تحسسها انك مندهش و سعيد و شاكر ليها
قل لها كلمة حلوة ...كلمة شكر ..كلمة اعجاب ..
بص لها نظرة حنان و عطف
طبطب عليها و حس بيها و بمشاعرها
اقفل عقلك من المشاكل و الهموم و الاحزان الى فيه
اقفل موبالك و تليفزيونك
و افتح قلبك للحب ....شوف الحاجات الى هى عاملاها علشان تعبر عن حبها ليك ..و نفسها تحس هى كمان بحبك
يوم واحد
يوم واحد بس
خلى فى قلبها ذكرى جميلة ممكن تعيش عليها السنة الجاية كلها
يا حسن ....ركز مع مراتك النهاردة
ليست هناك تعليقات:
إرسال تعليق