قالت : دكتورة انا بحب كلامك اوى و بدخل على صفحتك كل يوم و اتغيرت كتير
بس للاسف مش عارفة ليه اصحابى مش بيحبوا كلامك ؟
حبيبتى :
ربنا يجزيكى عنى خير الجزاء بكلماتك التى اسعدتنى ..ربنا يخليكى يارب
بس مش معنى انك بتحبينى و بتحبى كلامى ان لازم اصحابك كمان يحبوه
فالرسول صلى الله عليه و سلم قال : الارواح جنود مجندة ماتعارف منها ائتلف و ما تناكر منها اختلف
مفيش حد حبيبتى فى الدنيا هيجمع كل الناس عليه
دا حتى انبياء الله الاصفياء الانقياء أفضل البشر على الاطلاق كان فيه ناس بتكرههم و كارهة كلامهم و بيعادوهم و يحاربوهم و قتلوهم كمان
وغالبا زى ما بيقولوا الطيور على اشكالها تقع
غالبا بيكون فيه نوع من تقارب الطبيعة الشخصية و الافكار و المشاعر و الرؤى و حتى ممكن اسلوب الكلام ..
هو دا الى بيقرب واحد لواحد و يبعده عن التانى
انا الناس الى بحبهم من مشاهير الثقافة و العلم و الفن و الادب غالبا بتكون شخصياتهم شبهى و افكارهم شبه افكارى و اراءهم متقاربة معايا و اسلوبهم فى الكلام زيى
و فيه شخصيات الناس بتموت فيهم و انا مش بحبهم عادى
ممكن اسمعهم من منطلق انى اسمع المخالف لى و افهمه
بس بحس انهم بعيد عنى اوى
اختلاف الشخصيات و الافكار و المشاعر و التجارب و المعتقدات و التصرفات بتعمل اختلاف كبير اوى بين الناس
الاختلاف فى حد ذاته ضرورة
لكن المهم اننا نحترم بعض و لا يصل الاختلاف الى خلاف و عداوة و قبح
اشكرك مرة اخرى جزيل الشكر
ليست هناك تعليقات:
إرسال تعليق