قال : طلبت من زوجتى انها تبعد عن صديقتها الى انا مش برتاح ليها
قالت لى يعنى انا من حقى انى اطلب منك تبعد عن صديقك الى انا مش برتاح ليه ؟..الندية دى بتجننى
عزيزى :
أقدر جدا مشاعر حضرتك ..و اعلم تماما ان الندية دى بتستفز اغلب الرجال
و مع كل احترامى لمشاعر حضرتك
لكن احنا مجتمعات ذكورية ..الذكر فيها حاسس دايما ان له افضلية على المرأة هو الى بيفهم احسن منها و هو الى بيتصرف افضل منها ..
و دا معتقد خاطىء تماما
فقوامة الرجل تكليف و ليست تشريف ...مسئولية و ليست أفضلية
المرأة فى الشرع و الدين (بعيدا عن العرف الاجتماعى الظالم ) انسان كامل الأهلية تماما ..
لها كامل الحق فى التفكير و الاحساس والتصرف ..
لها كامل الارادة فى كل مايخص حياتها الشخصية ...
آراءها و علاقاتها و شغلها و مالها و ممتلكاتها
و الزواج لايعطيك الحق اطلاقا فى ان تفرض عليها أى شىء فيما يخصها ...تعرف مين و ماتعرفش مين
فيه رجالة بتفرض على زوجاتها ماتعرفيش الست دى
و تفرض على زوجاتها ماتروحيش لاهلك علشان مش برتاح لهم
و تفرض عليها ماتكلميش فلانة و علانة من الجيران
رأيك - أخى الفاضل - مجرد رأى ناصح ...بتنصحها بيه
مش واجب عليها تسمع كلامك فيه ....لانك كدة بتتعامل معاها زى العيل الصغير
دا احنا دلوقت بنقول حتى فى تربية الاولاد امنح اولادك حرية اختيار الاصدقاء و كن لهم ناصحا فقط
و خليهم يختلطوا بالناس كلها علشان يتعلموا و يكتسبوا خبرة فى التعامل حتى مع الناس الوحشة ..
لان العالم الى احنا فيه دا مفيش فيه ملايكة ...كل الناس فيها حاجة وحشة ...اى حد فى الدنيا حتى انت نفسك و مراتك فيكم حاجة غلط ..دى طبيعة البشر
هل معنى كدة اننا نتقوقع على نفسنا و نقفل عليها و ننعزل عن الدنيا ؟
أنا رأيى انك تسيبها تجرب الصديقة دى ...
و هتكشف بعد كدة ومع التجربة انها غير امينة
و حاول تفرق بين عدم ارتياحك للصديقة و الغيرة منها ..
لان ساعات حب التملك عند الرجل بيخليه يرفض اى صداقة لزوجته
او يمكن انك شايف انها بتفضفض كتير مع صحبتها ...ومتضايق من كدة
او شايف ان صحبتها مأثرة عليها و على تفكيرها و تصرفاتها
حدد تماما ايه الى مضايقك و الفت نظرها و سبها تتخذ حرية القرار فى هذا الامر
ممكن تبعد عن صحبتها حبا لك ..بس ماتفرضش عليها حبك ...خليه نابع منها هى
لما هتديها حرية القرار ممكن تختار تريحك بارادتها و هى سعيدة
هذا أفضل بكتير من انك تفرض عليها رأيك بالقوة و تتعسها و تحسسها بالقهر
أعلم تماما ان النساء و خاصة صغيرات السن معندهمش خبرة فى معرفة البشر
امنحها فرصة اكتساب الخبرة دى بنفسها ...بدون ان تفرض عليها ماتريده
هذا افضل ليها هى نفسها
و افضل لعلاقتكم مع بعض
و نصيحة للزوجة
علاقتك بصحبتك ماتجيبيش سيرتها كتير لزوجك
متعديش طول النهار تقوليله دى فلانة بتقول كذا و بتعمل كذا و جوزها بيعمل كذا و بيجيب كذا
بلاش تحسسيه انك بتسمعى كلامها اكتر ما بتسمعى كلامه
بلاش تحسسيه انك بتحبيها و قريبة منها اكتر منه
بلاش تحسسيه ان فلانة عارفة كل حاجة فى حياتنا و ممكن تتدخل فيها برايها
بلاش تحسسيه انك امعة ماشية ورا فلانة
و خلى علاقاتك بالناس حذرة
بلاش تدلقى كدة على اى حد و تنفتحى عليه مرة واحدة فى كل اسرار حياتك
و ربنا يستر
ليست هناك تعليقات:
إرسال تعليق