قال : أنا فعلا مش بحب مراتى و مش قادر احبها بس مضطر انى اعيش معاها علشان خاطر أولادى ..ازاى اتعامل معاها و انا مش طايقها
عزيزى :
بيوت كتير أوى غير قائمة على الحب ....
جوازات تمت بسرعة قبل ما ينمو حب و صداقة بينهم
جوازات كان فيها حب بس من كتر الخناقات و المشاكل دمرت الحب بينهم
جوازات مفيش فيها مشاكل بس فيه رتابة و ملل و المياة راكدة فيها
تعامل معاها زى ما بتتعامل مع مديرك الى انت مش طايقه
تعامل معاها زى ما بتتعامل مع عميلك الى مش نازلك من زور
تعامل معاها زى ما بتتعامل مع زميلتك فى الشغل الى انت مش متفاهم معاها بس لازم تشتغلوا مع بعض
احنا مش بنحب كل الناس الى حوالينا
فيه ناس بنتعامل معاهم بسبب احساسنا بالواجب ناحيتهم
وفيه ناس بنتعامل معاهم رحمة بيهم و شفقة عليهم
و فيه ناس بنتعامل معاهم كأمر واقع لازم نستحمله مع المحافظة على اخلاقنا على أد مانقدر
حدد واجباتك ناحيتها ..و دا أقل حاجة لازم تؤديها ليها
بعد كدة تعامل برحمة ..شوف انها انسانة محتاجة ليك ..محتاجة مشاعر رحمة و شفقة مش لازم حب
حاول تبص لتفاصيل هى بتعمل ايه كل يوم علشان تقدر مجهودها معاك و مع اولادك ..و تعامل معاها من باب الرحمة بيها و بالمجهود الى بتعمله ..ساعدها ..قدرها ...قل لها كلمة طيبة من باب المجاملة
افتكر كدة هى وقفت معاك اد ايه فى اول حياتك ..حاول تفتكر لها حاجة حلوة عملتها قبل كدة
تخيل مستقبلكم لما اولادكم يكبروا و كل واحد يستقل بحياته و هى الى هتفضل باقية ليك ..
و هى الى هتقدر تستحملك و تستحمل طبايعك ..
و هى الى هتقدر تشيلك لو وقعت و عجزت و محتاج خدمة وونس ..هى سندك فى كبرك
حبك ليها ضاع لانك ماحاولتش تجدده ....و حطيت تركيزك على عيوبها و اخطاءها ..مع ان ممكن تكون فيها مميزات تانية كتيرة بس الغشاوة على عينيك
حاول تبص لها بشكل تانى
حاول تفتكر وقفاتها معاك تانى
حاول ترجع معاها الذى مضى تانى
حاول تبدأ معاها الحب الى انت ماعشتوش قبل كدة
عارف لما يكون شاب معجب بواحدة وعايز يلفت نظرها و ينال حبها ..
بدل ما انت قاعد تشتغل على بنات الناس بالحرام ...
وسايبها فى الدنيا الرجالة يشتغلوا عليها و ما اكثر هذا الامر فى هذا الزمان مع سهولة التواصل
اشتغل عليها يا اخى بالحلال ..مايمكن السنارة تغمز
غير نظرتك ليها و ركز على الايجابيات
غض بصرك و تفكيرك عن النظر والتفكير فى غيرها ..علشان تعرف ترضى بيها
احيى الحب فى قلبها و مشاعرها لو انت فعلا لسة عايز تعيش الحب تانى
ادعى ربنا كتيييير فالقلوب بين يدى الله ..يارب يا مؤلف القلوب ألف بين قلبينا
ابذل مجهود ..اعمل حاجة علشان تكسبها و تكسب حبها ...و صدقنى يوم ما هتحس بحبها ..انت كمان هتحبها
لا تنسحب من معركتك باللامبالاة و السلبية و التجاهل و البحث عن أخرى
لان العلاقة مع الاخرى دى هيوصل فى وقت ما لنفس المصير
أدى لنفسك فرصة تحاول و ابذل مجهود يمكن يجيب نتيجة
لكن لو فعلا مش قادر خلاص و كارهها
اعرض عليها حل من الاتنين ..يا اما الطلاق او الزواج التانى
وفى كلتا الحاتين لا تظلمها ..يعنى انفصل او اتجوز بعقل و هدوء مع ضمان كامل لكافة حقوقها المادية ليها و لاولادها
ليست هناك تعليقات:
إرسال تعليق