لما ابنك يكون بيكلمك و يقول كلام قليل الذوق او قليل الادب
او يقول معلومات اصلا غلط او افكار غلط او استنتاجات غلط
لا تنهره و تعنفه
لا تسخر منه و تقول له ايه الكلام الفارغ الى انت بتقوله دا
لا تصرخ فيه و تقوله اتكلم بادب
لا تقاطعه و تقوله اسكت اسكت انت مابتفهمش حاجة
خليك فاكر ان ابنك لازم هيغلط ...بيغلط علشان هو طفل ..و علشان يتعلم الصح ..مش علشان يتهان و يتهزأ
الاهانة مش هتعلمه
الاهانة هتخليه مع الوقت معدش يتكلم معاك تانى ولا يحب يسألك
و هتفضل الافكار و المعلومات الغلط تتراكم فى دماغه زى الميكروبات الى بتتكاثر فى الجسم و تسبب المرض..
بس دى هتسبب خلل فى التفكير و تأثر على نمو الذكاء
لو ابنك اخطأ ...سيبه يخلص كلامه للنهاية
و حدد الغلط الى فى كلامه
و نبهه ليه بمنتهى الاحترام
هو كدة بيتعلم ان مش عيب الواحد يغلط
و هيكتسب مع الوقت الثقة فى نفسه و فى قدرته على التعبير عن افكاره و مشاعره بدون خوف من رفض الاخرين
حاول تدرب نفسك انت الاول على تحمل الكلام الى انت شايفه غلط بدون استثارة لمشاعرك
لان للاسف احنا كآباء معدش عندنا اى قدرة فى تحمل اى واحد بيقول كلام مختلف حتى لو كلامه صح ..اصبح داء مستفحل
درب نفسك مع ابنك
علشان لما يكبر و يبقى مراهق ..يقدر يستحمل كلامك ويفكر فيه بدل ما يعمل معاك زى ما انت بتعمل معاه دلوقت بالظبط
و بعدين نشتكى ...ابنى المراهق مش بيسمعنى ابدا ولا بيحترم كلامى
وهو انت كنت احترمته و هو صغير اصلا ؟
ليست هناك تعليقات:
إرسال تعليق