قال : أنا مش عاطفى ..و مش هقدر أكون رومانسى ...
وزوجتى عاطفية جدا ..و دايما عايزة اهتمام و كلام حب
لقيت على الانبوكس عندها واحد بيغازلها و بيقول لها كلام عاطفى و هى بصراحة مابتردش عليه
بس كونها سايباه من غير بلوك ..معنى كدة انها مبسوطة
أنا طبعا اتعصبت و زعقت و منعت عنها الانترنت
و مش عارف أعمل ايه ؟
عزيزى :
لازم تغير الصورة الذهنية الى انت راسمها عن نفسك ...
مش علشان انت مش عاطفى ..يبقى مش ممكن هتكون عاطفى ...
اى طبيعة فى شخصيتنا ممكن تتغير بالتدريب و الإراده
مفيش حد معندوش مشاعر و عواطف ...مفيش حد عايش من غير قلب بيحس و بيحن و يحب
المشكلة بتكون ان تفكيرنا مشغول بحاجات كتيرة اوى مش من ضمنها شريك حياتنا الى لازم ياخد وقت ما من تفكيرنا
معندناش اى استعداد نتغير علشان نسعده ...
لان فكرة اننا مسئولين عن سعادته مش فى دماغنا أساسا
المشكلة كمان اننا لم نتعود على التعبير عن عواطفنا ..
احنا بنعبر كويس اوى عن الغضب و الالم و التشاؤم و كل المشاعر الوحشة ..
طب ما تجرب تعبر عن المشاعر الحلوة الى جواك ..مش عيب و الله
و دا ممكن بالتدريب ..
حاول تكتب مشاعرك فى الاول الكتابة بتكون اسهل من الكلام ..
لو كل يوم تكتب جملة واحدة تعبر فيها عن مشاعرك الجميلة هتتعود
والمشكلة التانية اننا اتربينا بشكل بيخلينا دايما خايفين من الانتقاد ..من الفشل ..من ردود الأفعال ..عندنا خوف دفين من التغيير
انت بترجع البيت من شغل طول النهار بتشغل عقلك فيه ..
بترجع يا اما بتتفرج على التليفزيون والاخبار و الماتشات ...
او على الفيس و كله نشاطات عقلية جافة
لازم تعمل اعادة احياء لمشاعرك
اقرأ روايات ..اقرأ أشعار ...اسمع اغانى ...اسمع موسيقى ...ارسم ..اتفرج على صور جميلة ..اخرج للطبيعة
الفن الراقى عامة بيعمل عملية احياء لمشاعرك الى قتلتها الكورة و السياسة و الشغل و مشاكل البلد
ماتعدش ترمى بالمسئولية على حد تانى او اى حاجة تانية ..
اصل العيال ..اصل هى الى مش مقدرة تعبى ...اصل شغلى ..اصل المواصلات ..اصل الحر ..اصل ...اصل ....الموضوع دا مش هيحل مشكلتك
طالما عندك وقت ممكن تقضيه فى حاجات تانية غير الشغل يبقى الاولى هى شريكة حياتك ..
لان لو كل حياتك انت ناجح فيها و فاشل معاها ...دا هيأثر على كل نجاحاتك التانية بلا أدنى شك
انت ممكن تبدأ بحاجات بسيطة جدا ...
ابعت لها اشعار من على الانترنت ..
ابعت لها اغنية ..
ابعت لها ايموشن عاطفى ..
ابعت صورة مكتوب عليها كلمة ظريفة ...
دى حاجة لا محتاجة وقت و لا جهد ..
بس ممكن حاجة زى دى سبب رائع لسعادتها طول اليوم
اتصل بيها اطمن عليها فى وسط اليوم ..
ابعت رسالة قول لها وحشتينى ..
هات لها و انت راجع الشيكولاتة الى بتحبها ...
لو طلبت طلب ..حاول تلبيه و ماتنساهوش
الست العاطفية بتكون غالبا حساسة و طلباتها المادية قليلة
اتكلم معاها بصوت واطى ..بص فى عينيها و انت بتكلمها ...
امسك ايديها ..حسس على شعرها و كتفها ...خدها فى حضنك دايما
لما تكون تعبانة جسمانيا او نفسيا ..اسمعها و افهمها و تعاطف معاها
والله حاجات بسيطة أوى اوى ..بس بتفرق كتير مع المرأة العاطفية
جرب و حاول و شوف بنفسك الفرق ..
ماتعدش تقول انا مش هقدر لحد ما تضيع حبك من قلبها
هى عطشانه و هتموت من العطش
و مالهاش مكان تانى تشرب منه لانها ست محترمة
هتمنع عنها الانترنت ..بس هتعد تتفرج على افلام عاطفية و تتحسر
هتعد تسمع اغانى عاطفية و تتألم
هتعد تعيش فى الخيال و تحلم
طالما بتحبها يبقى انت عندك قلب و مشاعر ..بس مش عايز ..لانك مش مضرور فى حاجة و مفيش عندك دافع للتغيير
لو مش هتعمل كدة علشان تسعدها ..اعمله علشان ما تفقدش حبها
لأنها مع الوقت هتحس ان مشاعرها هى كمان بدأت تنشف تجاهك و معدش عندها قدرة على الحنان و العطاء ...
و ساعتها هتحس انها اتغيرت و تبدأ تشتكى من المشاكل
بس الحقيقة هى ما اتغيرتش ....
انت الى مش عايز تحافظ على مشاعرها ناحيتك بدون شحن ليها ...لانها فضت شحن
اشحنها يا اخى علشان تحافظ عليها
الانسان العاطفى بيكون الاهتمام و الحب أهم عنده من الأكل و الشرب
يارب نفهم
ليست هناك تعليقات:
إرسال تعليق