يعجز بعض الرجال عن فهم احتياجاتك العاطفية منه
و للاسف تعجز النساء عن التعبير عن احتياجها بشكل صريح
لما تطلبى من جوزك طلبات عاطفية حاولى تترجميها الى تصرفات عملية لان الرجالة عمليين يحبوا يتطلب منهم تصرفات عملية
يعنى ما تقوليش عايزة أهتمام
حبيبى ربنا يكرمك ممكن ساعة البريك تتصل بى اتصالة صغيرة اطمن على ..انشاله رسالة ..طب حتى رنة بس ...دى حاجة هتسعدنى جدا و تحسسنى انك مهتم
اتمنى ياروحى لما اقولك انى تعبانة و عندى انفلونزا ..ياسلااام لما تجيب لى الدوا و تقولى بالشفا ياحبيبتى ....تعملى كوباية حاجة سخنة ....تعمل لنفسك العشا و للولاد لان بيبقى فعلا جسمى تعبان ...تقولى خشى نامى شوية ريحى ياحبيبتى
ياريت يانور عيونى لما تلاقينى متضايقة و متعصبة ...تقولى مالك ياحبيبتى فيه ايه ..وتسمعنى ..و تطبطب على ..دا عيريحنى اكتر
بصى يا بنتى
لو قعدت طول النهار و الليل تقولى عايزة اهتمام
لو قعدت تغنى جباااار ..و ظلمووووه ...و مغرووووور ...مش هيفهم
لو منتظرة الحاجات دى تيجى لوحدها ...كأنك منتظرة الطيارة تيجى فى محطة القطر
اكسبى وقت
و خليكى عملية و صريحة
و اطلبى بقلب جامد وبمنتهى الذوق و الرقة و الحنية و الدلال و .....و.....
المهم تختارى الوقت المناسب لما يكون مزاجه رايق و عنده استعداد يسمع علشان يستجيب
ماتقوليش هيبقى دمها تقيل لو عملها
و هيبقى مالهاش طعم
انه يعملها من غير طعم أحسن من انه مايعملهاش خالص خليكى واقعية ..دى أول خطوة هتدربه على انه يعملها بعد كدة بطعم
و لو عملها دا دليل انه مكانش فاهم و اتعلم و دى خطوة كويسة جدا
احتفلى بيها و قدريها
ماتقوليش لازم تيجى من نفسه ...
نفسه مش هتجيب الحاجات دى لانه اصلا مشغول بحاجات تانية كتير ...سعديه على انه ياخد باله
شوفى انت عايزة ايه و اطلبيها بكل ثقة و بكل حنية
ولو عملها ابدى سعادتك و شكرك و امتنانك و ما تقطميهوش دا بيحبك فعلا وعايز يرضيك بس مكنش واخد باله او مش عارف ازاى
و لو ماعملهاش ...يبقى نطلبها باسلوب جديد و فى وقت تانى يكون متقبل
نجدد فى الاساليب لحد ما نلاقى المفتاح الى بيفتح القلوب المغلقة
و ربنا يعينك
ليست هناك تعليقات:
إرسال تعليق