قالت : تزوجته ملتزما محافظا على الصلاة فى المسجد بارا بوالديه قارئا للقرآن لا يجلس امام التليفزيون و الآن لم يعد هو من أعرفه ..تغير كثيرا و أشعر انى بدأت أكرهه
حبيبتى
أولا : الانسان طبيعى جدا انه يتغير ..مفيش انسان ثابت على نفس شخصيته طول عمره ..
لانه بيتعرض لخبرات جديدة ..بيواجه احداث و تجارب جديدة بتأثر عليه ..بيقرأ حاجات جديدة ..بيتعلم مهارات جديدة ...المجتمع من حواليه بيتغير فبيأثر عليه ...المهم ان التغيير واقع لامحالة
فيه ناس بتتغير للأحسن ..و فيه ناس بتتغير للأوحش
و فيه ناس بتتغير للأحسن فى جانب ..و للأوحش فى جانب تانى
كلنا بنتغير
ثانيا : كل واحد فينا حاطت معايير للالتزام و فاكر ان هى دى المعايير الوحيدة الصح
يعنى واحد شايف الملتزم هو الذى يؤدى العبادات الفروض و النوافل
واحد تانى شايف الملتزم هو الانسان الخلوق المهذب
واحد تالت شايف الملتزم هو الحافظ لكتاب الله القارئ فى علوم الشرع و الدين و ثقافته عالية دينيا
واحد رابع شايف الملتزم هو الى بيربى اولاده على الصلاة و الحجاب و الذهاب للمسجد و ملبس مراته النقاب
وواحد شايف الملتزم هو الى بيجاهد بكلمة الحق و بيخرج مظاهرات
كل واحد حاطط صورة معينة للملتزم فى ذهنه ...و كل الصور مقبوله عند ربنا ...لكنها للاسف مش مقبوله عند الناس
الرسول صلى الله عليه و سلم قال ان صاحب العلم هيدخل الجنة ...و الخلوق هيدخل الجنة ...و العابد هيدخل الجنة ...و الولد الصالح هيدخل والديه الجنة ..و عمل الخير و ادخال السرور على الناس يدخل الجنة ..و المجاهد بلمة الحق هيدخل الجنة
كل واحد له سكته و طريقته فى دخول الجنة لأن مفيش حد هيقدر يحصل كل حاجة
هو ممكن يكون بيؤدى الحد الادنى من العبادات فى البيت لكنه عالم فى مجال الطب مثلا و بيفيد الناس و يعالجهم و يخفف آلمهم و هيدخل الجنة بدا
ممكن يكون اخلاقه مش أد كدة بس بيجاهد نفسه بصدق و هيدخل الجنة بتعليم الناس علم نافع مثلا
نفسى نقبل كل صيغ التدين ..و مانحطش اطار معين رسمناه فى مخنا لصورة الملتزم ...اى حد يخرج براها يبقى غير ملتزم ...لان الصورة دى انت الى راسمها ...
ربنا يقبل كل صيغ التدين طالما فيه حد ادنى من الايمان و التصديق
ثالثا : انت مش مسئولة عن علاقته باهله او مستوى تدينه ...دى حاجة بينه و بين ربنا ..المفروض لا تحدد مدى حبك او كرهك لانسان
يعنى نفرض ان اختك مثلا مش متدينة او صاحبتك او جارتك ..و بترتكب بعض المحرمات و بتقصر فى بعض الواجبات ...هو فيه انسان كامل اصلا ؟
يعنى هل انت مثلا مش بتعملى ذنوب نهائى بتاتا ..مستحيل ..مفيش حد مش بيعمل ذنوب
الكره فى الله انى اكره عمله و استنكره و انصحه بالحسنى مش انى اكرهه هو شخصيا
علاقته بربنا دى حاجة خاصة بيه هو مش من حقى اتدخل فيها و لا اقيمه على اساسها ..كل الى على النصيحة بالحكمة و الموعظة الحسنة و بمنتهى الرقة و الادب
دايما حطى فى مخك ..انت غير مسئولة عن علاقته بربنا
حاولى تفصلى بين علاقته الانسانية بيكى و هو دا المهم بالنسبة ليكى ..و علاقته بربنا الى هى مسئوليته هو شخصيا وملكيش دعوة بيها
رابعا : فى حالة غريبة من انهيار تدين الكثيرين فى هذ الوقت ..يبدو انها بسبب التغيرات السياسية ...وصل بالبعض الى درجة الالحاد ...
فممكن تكون فترة و هتعدى ....
و ممكن يكون تغيير فى فهم معنى التدين أصلا
المهم
قدرتك على الكره و الحب بناء على درجة التدين دا يتوقف على افكارك انت و معاييرك و محتاجة منك شوية مرونة ..ورؤية للجوانب الايجابية فى جوزك
ليست هناك تعليقات:
إرسال تعليق