قالت : مامعنى الاستغناء العاطفى ؟؟؟؟؟
يعنى اعيش عمرى اتمنى زوج يحبنى ويشعرنى بالاهتمام والموده والاحتواء ...( واصووووووووم ) عشان لما الاقى الزوج ده اعيش فى حالة استغناء عاطفى .... يبقى ايه فايده الجواز ؟
فى مراحل النمو بتاعنا بنمر بتلات مراحل :
مرحلة الاعتماد التام على ماما فى الاكل و الشرب و اللبس و المذاكرة و العناية بالنفس ..و دى مرحلة الطفولة
مرحلة الاستقلال او الاستغناء ...و هى مرحلة أنا ممكن اعمل لنفسى كل حاجة و اقدر اعيش من غير ماما و دى مرحلة الشباب
مرحلة المشاركة ..و هى الرغبة فى ان يشاركنى أحدهم حياتى و هذا مايدفعنا الى الزواج
النضج النفسى يمر أيضا بالمراحل دى
- مرحلة الاعتماد نفسيا على حد ...
التحفيز و التشجيع لازم يكون من حد ..
التعاطف و الطبطبة لازم حد يعمله ..
السعادة لازم حد يقدمها لى .حد يزورنى ..حد يجيبلى هدية ..حد يحضنى ..حد يقولى كلمة مدح او تشجيع او اعجاب
حد ياخد لى قراراتى و يحل لى مشكلاتى
لازم يكون جنبى حد ولا استطيع الاستغناء عنه ..ممكن تكون ماما ..ممكن تكون صديقة ..ممكن تكون زوج
- مرحلة الاستغناء او الاستقلال العاطفى
انا مش محتاجة لحد ..
انا بعالج نفسى بنفسى فى لحظات السقوط ..
بدى لنفسى الحافز ...
بطبطب على نفسى و اصالحها ..
بدور على السعادة بنفسى لنفسى ..
بديها الحافز و الدافع من جوايا ...
و دى مرحلة مهمة جدا
- يليها مرحلة المشاركة العاطفية و دى قمة النضج
و هى مرحلة بحس انى لازم اشارك حياتى العاطفية مع حد ..مش اعتمادا عليه ...يعنى لو سافر او هاجر او بعد او مات او حصل له حاجة ..انا مش هنهار لانى مش معتمدة عليه عاطفيا ...
ولكن اشاركه افراحى و احزانى و آلامى و أمالى و حياتى كلها
الشعور بالاحتياج الى انتى بتقولى عليه
انا عايزة اتجوز علشان احس بالاهتمام و المودة و الاحتواء كلام جميل جدا
و مفيش فيه اى مشكلة و حقك
و كل الناس بتتجوز علشان كدة
لكنه احساس بينغص عليكى عيشتك بعد الزواج
لان ممكن الطرف التانى مايعرفش يديكى الى انتى عايزاه ( جهل - طناش - عدم تحمل مسئولية - مغصوب على الجواز )
فطول ما انت منتظرة و عايزة و محتاجة ...عمرك ماهتحسى بالسعادة
انا أفضل انك تقولى انا عايزة اتجوز علشان أحسس جوزى بالاهتمام و المودة و الاحتواء
لو انتى فى حالة استقلال ..هيبقى عندك قدرة على العطاء العاطفى دون انتظار مقابل ..
وهو دا أحد أسرار السعادة الزوجية الى انا بقول عليه
بدل ما يبقى تفكيرك كله منصب على هو هيعمل لى ايه ..و هو هيجيب لى ايه ..و هو هيحبنى ازاى ..و هو المفروض مايعملش ايه بدال بيحبنى
هيبقى كل تركيزك على أنا اعمل له ايه علشان أعبر له عن حبى
هو محتاج ايه علشان أسعده
قدرتك على العطاء بتزيد جدا حتى لو هو مقل فى عطائه
و دا مش من الزوجة بس
لو الزوج كدة برده
و كل تركيزه على ازاى يسعد و يريح و ينجح مراته
هيعيشوا هم الاتنين فى منتهى السعادة
لان كل واحد فيهم مركز على العطاء و ما يسعد الآخر
يارب تكون الفكرة وضحت
الزواج المبنى على الاحتياج المزمن والانتظار المزمن زواج غير سعيد
لان القلوب علطول مليانه احباط و يأس و استياء من عدم تلبية الطرف التانى احتياجك
انت بتتجوز علشان المشاركة العاطفية و الحب المتبادل و هو دا الحب بين شخصيتين ناضجتين بيبقى حب بدون معاناة
الحب مع الاحتياج بيبقى فيه فعلا معاناة شديدة من الطرف المحتاج ..و الطرف الآخر لانه حاسس انه مش عارف يرضيه ابدا
لكن لو كل طرف ركز على عطاءاته و ليس احتياجاته ...هتكون الحياة فى منتهى السعادة
ليست هناك تعليقات:
إرسال تعليق