قالت : بالنسبة لمشاكل الخناق بين الاصحاب بره البيت
ابنى مش بيقدر على الشكل بس اوقات بيتحط فى مواقف بتضطره يتشاكل
ومش بيقدر ياخد حقه ودموعه قريبه جدا من اى موقف بيعيط
اضغط عليه واقوله لازم تاخد حقك وتضرب زميلك وازاى تعيط قدامهم
ولا اعمل ايه لو سمحتى قوليلى بتحط فى الموقف ده كتير ابنى عنده 13سنه
.....................................
القدرة على الخناق دى بتختلف على حسب شخصية الطفل
فيه طفل من صغره عنده القدرة على الخناق و الشكل و الضرب و استخدام القوة
و فيه طفل ماعندوش القدرة دى و دا بيبقى غالبا طفل حساس و عاطفى اكتر وماعندوش القدرة على ايذاء حد حتى لو بادر الآخر بالايذاء
الهدف فى التربية اننا نوصل لحالة من التوازن
يعنى الطفل الى علطول بيستخدم قوته و عضلاته نخليه يستخدم عقله و لا يبادر بالاعتداء و يضبط انفعالاته بحيث ما تبقاش دى الوسيلة الوحيدة للتعامل مع اصحابه
و الطفل الى مابيعرفش يعمل كدة ...نشجعه انه يعملها عند الضرورة لو تطلب الامر دا و مانحسسوش دايما انه ضعيف ..و نكسبه الثقة فى نفسه
فان كان لايملك قوة الذراع ..او قوة اللسان ..فهو يملك قوة القلب و المشاعر الطيبة ...غيرى انتى الاول فكرتك عنه
للاسف بنربى فى اولادنا انه لازم يضرب و يشتم و ياخد حقه بذراعه و هى دى القوة ...و لما جوزك يضرب و يشتم تزعلى !!!!!!!!
وبتقوليله العياط غلط و ضعف ..و نشتكى من قسوة قلوب ازواجنا !!!!!!!
هتعدى مع ابنك
و تقوليله انا مقدرة حنيتك و قلبك الرقيق وانك مش بتقدر تؤذى حد
و دى نقطة جميلة جدا فيك حبيبى ...و انا بحبها و فخورة بيها
انت كدة هتكون ابن حنون ..و هتكون اب رائع ...و هتكون زوج جميل ..وهتكون صديق عطوف ..و الناس كلها هتحبك
اديه الثقة فى نفسه ان دا مش ضعف بل قوة فى مجال تانى غير العضلات
بس فيه مواقف فى الحياة لازم نستخدم فيها القوة و خاصة ادام الناس الى مش بيفهموا الا لغة القوة
فيه اولاد عضلات ..جتة ..دول بيستقووا على غيرهم بقوتهم و عضلاتهم و دول لازم ترد اعتداءهم بالقوة علشان لا يتجرءوا عليك تانى
انت مش هتبادر بالضرب بس على الاقل تدافع عن نفسك بمنتهى القوة
لو ضربك اضربه ....لو شتمتك شتيمة وحشه اضربه
خليه يتدرب تدريبات رياضية لتقوية جسمه و يتعلم كام حركة كدة ممكن يدافع بيها عن نفسه ادام الاطفال المتنمرون دول
هنستخدمها برده لرد الحق ..يعنى طفل أخد منك قلمك بالاكراه مثلا ..هتاخد حاجتك منه بالقوة
الهدف انك تحددى المواقف الى لازم يستخدم فيها القوة لرد الاعتداء و رد الحقوق
الاولاد طبيعتهم انهم بيحبوا يلعبوا بالمصارعة ..دى وسيلة للعب ..لو مش مناسبة ليه خلاص يتجنبها طالما الموضوع مجرد لعب
قوى عنده ملكة التفكير ..يعنى نمى عنده قوة العقل فى مقابل قوة العضلات
تعال نفكر ممكن نحل المشكلة دى ازاى بالعقل وبدون اللجوء للعضلات
لو المشكلة مع طفل عادى ..صديق مثلا ....هيتكلم معاه بالعقل و يقول له انت عملت فى كذا وانا اتضايقت و انا عايز كذا بمنتهى القوة
علميه يعبر عن مشاعره و يطالب بما يريد من صديقه
لكن لو طفل متنمر
الاطفال المتنمرون دول اثرهم النفسى للاسف رهيب على اولادنا
خليكى دايما واثقة فى ابنك انه يملك قلب جميل لايملكه هذا القوى المتنمر و بلاش تحسسيه دايما انه كدة ضعيف
حددى المواقف الى لازم يستخدم فيها القوة
خليه يقدر يحل مشاكله بالعقل و المنطق
دربى جسمه و خليه يمتلك القوة العضلية ..
دا هترجع له الثقة فى نفسه ..انه يملك قوة القلب و العقل فى مقابل قوة الذراع و اللسان
وانه مش ضعيف بل انه يملك نوع آخر من القوة
ليست هناك تعليقات:
إرسال تعليق