الى موجود فى عقلك عن الصداقة هتلاقيه فى الواقع
و الى يصدقها حديث ( انا عند ظن عبدى بى )
(و تفاءلوا بالخير تجدوه )
طول ما أنت حاطت فى مخك ان العثور على الأصدقاء المخلصين صعب ..
طول ما هتلاقيها كدة فى الدنيا صعبة
ليه بأة ؟
لانك بتشوف واحد مثلا بتحس انه كويس ..بس الفكرة مخلياك شاكك ..فتعد متربص ليه للغلط علشان تأكد الفكرة الى مخك ...و اول ما يعمل الغلط ..تقول فعلا مفيش صداقة فى الزمان دا
بس لما تكون داخل على العلاقة و انت متفائل ..و ناوى تكسبه كصديق ...هتلاقيه صديق ..و حتى لو غلط.. هتحس ان مفيش مشكلة
الصداقة اقوى من الغلط ...الغلط يتصلح ...ممكن نتسامح ...لكن الصديق لا يعوض ..
لما تشوف الناس كلها بتوع مصالح ...وانت بتدور على الصديق الى مش بتاع مصالح ...اول ما تلاقى واحد كويس و تقول الانسان دا كويس ...و يطلب منك طلب ..ايييييوة يبقى دا بتاع مصالح
مع انك لو عملت له المصلحة ممكن تكسب علاقة جميلة جدا ..لو هو فعلا انسان كويس ..و تلاقى واحد فعلا ممتن ليك ..مش الكل طبعا بس هتلاقى
لما تشوف الناس كلها بوشين ...و انها ممكن تكون ادامك بوش و تتكلم عنك من ورا ظهرك ...أى واحد هيبقى معاك كويس ..هتعد تتطقس و تنقب وراه ياترى بيقول على ايه فى غيابى ..واول ما تلاقى الى انت عايزة هوب تمسك فيها و تأكد الفكرة
ساعات فكرتك انت عن الصداقة الى غلط
فاكر ان الصديق لازم يكلمك طول النهار ...كل يوم ..لازق فيك ..يقولك كل اسراره و تقول له كل اسرارك ..لو زعلت يسيب الدنيا ويجرى عليك ...لو فرحت عايزة معاك علطول ...يعنى بتبقى انت اساسا طلباتك كتيرة اوى و خنيق و كثير اللوم لاى صديق تصاحبه ..لانك عايزه يكون زى الصورة الى فى مخك عن الصداقة
لما فعلا تدخل على العلاقات بقلب سليم و نية صافية
لما تدعى ربنا و تقوله يارب احتاج الى صديق مخلص
لما تختار الناس الصح من الأول ..الناس الخلوقة
لما تكون انت نفسك اخلاقك راقية و محترمة
لما تتوقف عن التوقعات و الطلبات و لوم الناس عن تقصيرها معاك و تبادر انت اولا بالعطاء
صدقنى هتلاقى الصديق الى نفسك فيه ...و يمكن عدة اصدقاء كمان ...وهتلاقى منهم اكتر مما كنت عايزة كمان
ليست هناك تعليقات:
إرسال تعليق