ليه لازم نعمل الواجب ؟
كل واحد فى الدنيا عنده واجب
بابا بيروح الشغل علشان دا واجب عليه
ماما بتشتغل فى البيت و تطبخ و تغسل هدومك و ..و..و..علشان دا الواجب بتاعها
جدو بيعل كذا علشان يعمل الواجب
و فلان بيعمل كذا علشان بيعمل الواجب
ودا هو الواجب بتاعك ..لازم يتعمل
مفيش لعب و لا تليفزيون الا بعد الواجب
علميا قدرة الطفل على التركيز المستمر بتكون عدد سنوات عمره زائد خمس دقائق
يعنى لو عنده 6 سنين ...مش هيقدر يركز اكتر من 6+5 =11 دقيقة بشكل مستمر
لازم تكون النقطة دى واضحة عند الام
بعد 11 دقيقة خليه يعمل اى حاجة ..يشرب عصير ..ياكل حاجة حلوة ..يجرى شوية ...يتشقلب ..المهم لازم يفصل علشان يقدر يكمل تانى
ما تقوليش ابنى مش بيركز فى المذاكرة ...هى دى طبيعة الطفل ..اديله فرصة و يرجع تانى
ثانيا : أفهمة فكرة الوقت المحدود و تنظيمة .....يعنى من ساعة ما يبدأ مذاكرة لحد ما ينام بالليل ..كم ساعة ؟
و ليكن 4 ساعات
هنفهمه ان كل ما نعمل الواجبات أسرع و باتقان ...و دى نقطة مهمة ( السرعة و الاتقان ) كل ما هنلعب أكتر
لكن هنعد نشتت ذهننا و نلعب كل شوية الوقت هيضيع ومش هنلعب كويس
ثالثا : أفهمه فكرة تحديد المهمات ....يعنى علينا ايه النهاردة ؟
عندنا واجب رياضة ..وواجب عربى ..وواجب انجليزى مثلا
رابعا : ركزى على الحاجات الى بيحب يلعبها ..فيديو جيم مثلا ..لو بيلعب مع الجيران شوية ..لو بتتصل باصحبها تعد ترغى معاهم...بيتفرج على التليفزيون
يعنى ايه النشاط الى الطفل بيحب يمارسه و يستمتع بيه
هنقوله : مفيش كذا ( النشاط الى هو بيحبه ) الا بعد ما نخلص الواجب ...
كونى جازمة جدا فيما اتفقتم عليه
هيعد يترجالك و يلح عليكى علشان يزاول نشاطه المعتاد ...علشان يختبر مدى جدية هذا الكلام
للاسف امهات كتير جدا اتعدودت انها تتفق و قلبها يحن من الالحاح فترجع فى كلامها ...وهى كدة بتخلى ابنها يفقد ثقته فى اى كلام بتقوله .
بيعرف علطول ان اى اتفاق قابل للنقض ...و ان اى وعد قابل ان يخلف ..و ان اى تهديد كلام فى الهوا
و بعدين تشتكوا ابنى مش بيسمع الكلام ...كونى حازمة تماما ادام اى الحاح
خامسا : طول ماهو بيعمل الواجب اكثرى من كلمات ..هايل ..برافو ..ممتاز ...انا فخورة بيك ..انا سعيدة بيك ..
فترة تركيز الطفل محدودة ..تقبلى انه لازم يزوغ منك و تركيزه يقل ..اسمحى بشوية تنطيط لو حركى ..شوية رسم ..يروح يشرب ..كوباية عصير ..بس ابعدى تماما عن النشاط الى بيحبه لان دا بعد ما نخلص تماما ...دا علشان يستعيد تركيزه تانى
سادسا : لو خلص مادة اديله عشر دقايق راحة ..يعمل فيها الى هو عايزه لحد ما نرجع للمادة التانية ..خليه برده يعمل اى حاجة تانية غير النشاط المحبب ليه
سابعا: لا تعوديه انك لازم تكونى قاعدة جنبه ...اديله المهمة المطلوبة منى و روحى اعملى اى حاجة تانية ..
ولو اتعود خلاص و الى كان كان ..اسحبى نفسك بالتدريج جدا ...يعنى واجب واحد فى اليوم
و شجعيه انه يعمله لوحده
يعنى قوليله انا هكون سعيدة جدا لو لقيتك عامل الواجب دا لوحدك ...هحس انك كبرت و بتعتمد على نفسك ..يلا يا بطل
ثامنا : لو خلص بسرعة كويسة و اتقان (حقق الهدف )
مش بالسرعة الى ترضيكى ...لأ لو لقيتيه انه أفضل من امبارح ...هاتيله جايزة ...بوسة ..حضن كبير ..العبى معاه شوية ...حاجة حلوة ...المهم يحس انه انجز مهماته ...ركزى على القيمة و غرس المبدأ (السرعة مع الاتقان )
وعلشان خاطرى ..اضحكى و خليكى مبسوطة و هو بيعمل الواجب ..بلاش التكشيرة ..بلاش الزعيق ..بلاش التهديد بالضرب و الضرب ..علشان يحب المذاكرة و ما تبقاش وقت التعذيب بتاعه
حطى فى بالك لو حتى الواجب ما اتعملش ..هيجرى ايه يعنى ؟
بلاش تكونى دايما مضغوطة عصبيا بسبب واجبات الاولاد ...
حطى فى بالك دايما (العلم فى الراس مش فى الكراس ) و فعلا المهم العلم الى دخل مخه مش هو الى بيكبه فى الكراسة
و ربنا معاك
ليست هناك تعليقات:
إرسال تعليق