يصلنى هذا السؤل كثيرا
اما حب من طرف واحد
أو حب من طرفين الظروف لم تسمح لهم بالزواج
إما حب نشأ بين متزوجين و ليس لديهم رغبة فى الطلاق من شركاء حياتهم
انا شخصيا لا أرى أى أمل فى إخماد الحب فى القلب إلا بقطع التواصل نهائى
الحب مشاعر يغذيها الحواس البصر و السمع و اللمس والشم
والخيال و الاحساس
كل ماشفته او شفت حتى صورته أهاجت مشاعر الحب فى قلبك
و قد تفسر نظراته و حركاته بانه يكن لك مشاعرحب أو لازال يحبك أو عايز يرجع لك
كل ما هتسمعه او حتى تقرأ كلامه بيشتغل عقلك فى تفسير كل كلمة على انها موجهه ليك وانه يقصدك و انها كلمات تدل على حبه ليك
كل ما تلمسه بالمصافحة تسرى الحرارة فى جسدك و يشتعل شوقك و لهيبه و ممكن تفسر لمساته برغبته فى التقارب منك
كل ما تشم ريحته اهاجت خيالات و تصورات ينسجها خيالك و تعد تتخيل احداث هتحصل فى المستقبل بينكم
كل ماتعد لوحدك هتقعد تفتكره و تفكر فى احداث و حوارات و مواقف عشتوها مع بعض
هتفضل عايش على أمل عودة التواصل أو على ألم انهاء العلاقة مع احتراق للقلب
من الناحية العلمية الفسيولوجية العلماء وجدوا أن الكيماويات الى بتتكون فى جسم المحبين وهم مع بعض و بيفكروا فى بعض أو بيتكلموا مع بعض و الكيمياء الى بتحصل لهم تشبه الى حد كبير كيماويات الادمان
يعنى قطع العلاقة بيكون بالظبط عامل زى مدمن المخدرات الى بيتعافى من الادمان
و آلامه النفسية بتكون زيها
بس بتفرق على حسب درجة إدمانه حسب طول فترة الادمان و جرعته
يعنى قطع علاقة بين مخطوبين غير قطع علاقة بين محبين غير قطع علاقة بين متزوجين
قطع العلاقة بعد علاقة استمرت سنة غير قطعها بعد علاقة استمرت سنتين غير علاقة استمرت 15 سنة
عمق العلاقة و تكرار التواصل بيحدد الى حد كبير مدى الألم فى قطعها
و كذلك مدى اعتماد كل طرف على الآخر فى منحه رغباته و اشباع احتياجاته و تعلقه و التصاقه به ودى احتياجه اليه بتحدد برده حجم الألم الناتج عن الفراق
فيه ناس بتستمتع بحالة الحب بلا أمل الى هو عايش فيها بس هيفضل يعانى من ألم البعد
وقد يعتقد البعض ان قطع التواصل نهائى هروب ...
و لكنى أراه كالهروب من النيران عند عدم القدرة على مواجهتها و اطفائها
فيه شخصيات ممكن تنهى حالة الحب فى قلبها و تحول العلاقة الى زمالة و صداقة
و دول الشخصيات المنطقية العقلانية التى تمنطق المشاعراو انها لم تشعر بتعلق شديد أو احتياج شديد لمن تحب
و طالما هو مش بيحبنى أو مش هيقدر يتجوزنى يبقى مفيش داعى انى احبه بالمنطق كدة
و فيه شخصيات تحب من يحبها و طالما التانى مش بيحبنى فمفيش داعى انى أحبه بتقدر تسيطر على قلبها
لكن فيه ناس اكثر عاطفية و مشاعرية و لاسيطرة لعقلها على قلبها سريعى الحب و التعلق و الهيام
فدول الى محتاجين للهروب فان المواجهة تضعف المقاومة
قطع التواصل نهائى هو الحل الوحيد
يعنى لا تشوفه و لا تكلمه ولا تحاول تعرف اخباره و لا تسمع عنه و تبعد عن اى مكان ممكن يتواجد فيه
ودا طبعا محتاج ارادة فولاذية فى البداية و علشان تقدر تستمر
و لكنه لا يعنى انقطاع الألم و الحزن أو النسيان أو توقف اللهفة و الحنين
دا ممكن يستمر شهور وممكن سنين حسب عمق العلاقة و طولها و مدتها زى الادمان بالظبط
بس فى النهاية بينتهى و يتم الشفاء إن عاجلا أو آجلا بالتدريج الشديد
يعنى بتوقف التواصل معاه بس مش بيروح من مخك و تفكيرك
هتعد فترة كدة
لحد ما يروح الحنين و اللهفة و الرغبة الملحة فى اعادة التواصل يعنى هتتعود على غيابه من حياتكهتعد فترة كدة
لحد ما ييجى عليك ايام مش بتفتكره خالص
و بالتدريج هتلاقى نفسك تفتكره على فترات متباعدة
وبعدين مش هتفتكره الا لو حصلت حاجة تفكرك
بس أكيد مؤكد مش ممكن هتنساه نهائى بحيث انه يذكر اسمه ماتفتكرش مين دا و دا طبعا مستحيل
اكيد هيزورخيالك كل فترة ...كل ماتحتاج اليه ..كل ماتحس انه وحشك ..كل ما تشوف حاجة تفكرك بيه
محدش بيقدر ينسى حب حبه
بس ممكن يتناساه و يعيش حياته عادى و يحب تانى عادى
و فيه حالات ممكن تتعافى سريعا بحب جديد مش جواز جديد
شخصية جديدة تظهر فى حياتها تعوضها فقدانها للاول
لكن الزواج من آخر و انت لسة فى حالة حب و عشق و تعلق بالأول ظلم شديد لهذا الآخر لن ينسيك الأول
و ستظل تعانى من حبك القديم الذى لم تتعافى منه
و مسئوليتك تجاه العلاقة الجديدة الى انت مش قادر تعطيها ماتستحق
ناس كتير بتعملها علشان تغيظ الاولانى و تثبت لنفسها انها لازالت مطلوبة و مرغوبة ..
بس دا خطر لانه ممكن أوى لاينجح وبتزود معاناتك اكتر
تعافى من الحب القديم و خد وقتك و بعدين ارتبط بحد جديد و انت مهيأ نفسيا لتحمل تبعات هذه العلاقة الجديدة
ليست هناك تعليقات:
إرسال تعليق