لا تقولى : هو انت دايما كدة ترمى هدومك على السرير .
ملحوظة : فى كلامك مع زوجك ما تقوليش كلمتين لانهم بينرفزوا جدا (دايما و ابدا )
انت دايما تعمل كذا
و عمرك ماعملت كذا ابدا
قولى : حبيبى
هبقى سعيدة جدا لو انك تعلق هدومك على الشماعة
انا بتضايق لما ترميها كدة فى اى مكان
مرة و اتنين و تلاتة
و لو عملها مرة
قوليله : انا سعيدة جدا انك اهتميت و علقت الهدوم
و اديله بوسة و حضن كبير
انا عارفة انها حاجة بسيطة بس انا مبسوطة انك اهتميت
ربنا يخليك لى يارب
مشكلتنا ان كلامنا زى الرصاص و بعين نزعل هم مكشرين ليه ؟
لاتقولى : انت اهنتنى لم وقفت تهزر مع فلانة من غير اى اعتبار لى
ملحوظة :كلمة (انت ) بتحسس الاخر بالهجوم عليه فيبدأ يجهز الدفاعات و الهجوم المضاد علطول و يمكن يطلعك انت الى غلطانه
قولى :أنا حسيت بالغيرة لما وقفت تهزر مع فلانة أدامى ..و حسيت انى متضايقة جدا
اتمنى من فضلك انك تراعى مشاعرى لما اكون معاك على الأقل
كلمة (أنا ) بتقلل شوية من احساسه بالهجوم
ما تعديش تتكلمى كتير
كلمتين تعبرى فيهم عن مشاعرك و خلاص
لما بتتكلمى كتير الكلام المهم بيتوه فى النص و مابيبقاش فاهم انت عايزة ايه بالظبط
لا تقولى : هو انت علطول مصمم تعمل الحاجة الى بتضايقنى
انت عارف انك لما تنتقدنى ادام اهلك دا بيضايقنى و برده مصمم تعمله
ملحوظة : احساس الرجل انك بتسيئى فهمه بانه مصر على ايذائك دا بيخليه لا يعبأ بانه يتصلح ..طالما انتى فاهمة انه مصمم يضايقك
قولى : انا بتضايق جدا لما تنتقدنى أدام اهلك
انا عارفة انك مش قصدك ( افترضى فيه حسن النية )
اتمنى انك تخلى بالك بعد كدة
لما تفترضى حسن نيته و ان العمل غير مقصود هيكون عنده دافع انه يصلح سلوكه علشان ماتفهميهوش غلط
لكن لو انتى مفترضة فيه سوء النية ...طب هيتصلح ليه ؟
من الذوق انك لما تيجى توجه الآخر الى خطأ ارتكبه انك تذكر 4 حاجات
- أنا أشعر بكذا .......حدد مشاعرك السيئة الى انت حسيت بيها
- لما حصل كذا .....حدد الموقف السلبى الذى اساءك
- اتمنى تعمل كذا .....حد الموقف الايجابى الى انت عايزه بدلا منه
- سأشعر بكذا ...حدد مشاعرك لما يتعمل الموقف الايجابى
الموضوع دا بييجى بالتعلم و التدريب المستمر
انا حسيت بالحزن لما نسيتى يوم ميلادى و كنت هبعى سعيد اوى لو قلت لى كل سنة و انت طيب
انا بحس بالغضب لما اجى من الشغل مالاقيش الاكل جاهز ...وهكون سعيد جدا لو بدأتى الطبيخ بدرى شوية
انا بتضايق جدا لما كل يوم ادخل انام لوحدى ...هبقى مبسوط اوى لو دخلت تنامى معايا و نتكلم مع بعض شوية قبل ما ننام
قرأت دراسة النهاردة ان 90% من المطلقين كانوا بيتكلموا مع بعض باسلوب عدائى و عديم الذوق و الاحساس
لو صلحنا كلامنا يمكن تتصلح تصرفاتنا ...يارب
ليست هناك تعليقات:
إرسال تعليق