قال : كل الرجالة بيشتكوا ان زوجاتهم نكدية و غاوية مشاكل
ممكن تدينى روشتة علاج للنكد دا من غير كلام كتير
- حاضر من غير كلام كتير :
* لو دايما حاسة انها مضغوطة و خاصة الزوجة الى بتشتغل يبقى تساعدها او توفر لها حد يساعدها
* لو دايما حاسة انها متضايقة و مزاجها سىء ..
يبقى شجعها انها تقلل التعرض للحاجات الى بتعكر مزاجها زى التليفزيون و وسائل التواصل و الناس الى بيضايقوها و اى حاجة او حد بيضايقها و تساعدها و تشجعها على كدة
* اديها حرية انها تمارس انشطة بتحبها ..لو بتحب تتسوق بس حطلها ميزانية محددة ...لو بتحب تخرج مع اصحابها ..لو بتحب تروح لاهلها ..لو لها هواية معينة شجعها و لا تحبطها
*فكر ايه الحاجات الى هى بتضايق منها و انت بتعملها
و طلع من دماغك افكار انى انا كدة و مش هتغير و انها لازم تتعود على كدة و الكلام الفارغ الى بيخرب البيوت دا ..
طالما حاجة بتضايقها و انت مش عايزها نكدية يبقى الحل انك تنتهى عنها او تقلل منها بالتدريج
* فكر ايه الحاجات الى لو عملتها هتكون سعيدة
عارف لو انت راجع البيت كل يوم و بتفكر اسعد مراتى ازاى النهاردة ؟
و تعمل كدة تصرف ظريف يدل على حبك و اهتمامك ..جرعة سعادة يومية
خمس علاجات ضد النكد
لو حاسس انهم كتير ..جرب واحدة واحدة ..و لاحظ الاثر
والاثر دا يعنى التحسن مش العلاج التام
جرب و ادعيلى
ملحوظة : الروشتة دى تنفع للرجالة النكدية برده و بالشفا ان شاء الله
ليست هناك تعليقات:
إرسال تعليق