اعتدنا و نحن صغار على المذاكرة بأسلوب معين فقد كنا نتلقى الدرس فى المدرسة ...ثم نعود نذاكر الدرس أولا ..ثم نبادر بعمل الواجب عليه ..وقد لا نكتفى بالواجبات فقط بل نبادر الى حل المزيد من الاسئلة لتثبيت معلومات الدرس فى مخنا
كنت أذاكر كل صغيرة و كبيرة من الجلدة للجلدة ( أنا طبعا بتكلم عن نفسى )
كل واحد فينا كان له اسلوبه فى المذاكرة الى اتعود عليه و الذى يراه هو الاسلوب الامثل الى المفروض اولاده يذاكروا بيه علشان يجيبوا درجات كويسة
فبتلاقيه طول النهار خناق علشان يفرض اسلوبه على ابنه
اسلوبك مش لازم يكون هو الأسلوب الأمثل فى مذاكرة ابنك
فالأطفال مختلفون ..كما الكبار تماما
فهناك الطفل السمعى و الذى يعتمد فقط على السماع من المدرس و لا يحتاج الى القراءة و فتح الكتاب
و هناك البصرى والذى يعتمد على القراءة البصرية فى فهم المعلومات
و هناك الطفل الحركى و الذى لايقوى على السماع او القراءة بل يريد ان يتحرك بالمعلومة ..يمثلها ..يجربها ...يريدها كائن متحرك ...و دا الطفل المظلوم فى مدارسنا و الذى يعتبرونه فاشل و هو طفل مبدع ولكن محدش بيعرف يفهمه بالاسلوب الى هو بيفهم بيه ..و أغلب العلماء الى فشلوا دراسيا كانوا من هذه النوعية
و هناك الطفل الحسى ..هو لايهمه المعلومة أو المادة نفسها ..بل يهمه حبه للمعلم
و هناك طفل منطقى يحب الرياضيات و العلوم و العلوم التجريبية
و هناك طفل يميل الى العلوم الانسانية و الفكرية
هناك طفل اجمالى يحب فهم الموضوع بصفة عامة
وهناك طفل يهوى التفاصيل و يسأل عنها بشغف
الأطفال متنوعون فى كيفية الحصول على المعلومة و فهمها و تخزينها و استحضارها وقت الحاجة اليها
لكن نظامنا التعليمى الفاشل الذى لايراعى هذا التنوع هو السبب فلاتكلف طفلك مالا يطيق
ليس من المهم أن يكون ابنك الأول دائما ..فلن يكون كل الأطفال أوائل وليس من المهم أن يكون شاطر فى كل المواد ...لأنه فى النهاية هيتخصص فى جانب واحد و مش هيستفيد حاجة بالى أتعلمه فى المواد التانية مستقبلا
لا تخضع لضغط المعلمين الى دايما يعتتوا فيك ان ابنك مش مركز او ابنك مش كويس فى مادة او مادتين و تحاول تضغط عليه علشان يبقى كويس فيها لان ممكن تكون المشكلة فى المعلم نفسه
او فى طبيعة المادة الى ابنك مش قادر يستوعبها ..
او فى الطريقة الى بتدرس بيها الى هو مش هاضمها
تقبل ان ابنك ممكن يكون عنده مشكلة ..و تعايش مع هذا ..و لا تستمر بالضغط عليه ....لان دا طبيعى جدا
أكثر حاجة ممكن تقدمها لابنك انك تفهم و تستوعب قدراته العقلية وانك تلاحظ و تكتشف مواطن التميز عنده ..و تشجعها و تنميها لانها دى الى ممكن يحدد بيها مستقبله
و انك تكتشف طريقته الاساسية فى الحصول على المعلومات ...و تعلمه ازاى ممكن يستفيد بيها
و انك تبطل تفرض عليه اسلوبك فى المذاكرة ...خليه يذاكر بالطريقة الى تريحه .
ليست هناك تعليقات:
إرسال تعليق