وقت المذاكرة من أول kg1 وقت عصيب على الامهات
هى بتكون مستعجلة و عايزة تخلص اوام علشان لسة جاية من الشغل ووراها طبيخ و البيبى عايز يرضع و يغير و بيزن و عايزة تخلص قبل ما جوزها ييجى و يبدأ هو كمان طلبات و....و.....
يعنى بتبدأ تعد مع الولد و هى متعصبة و متوترة اصلا
و بعدين عايزة الطفل يمسك القلم يعمل الواجب بمنتهى الدقة و الاتقان كما لو انه عنده ١٠ سنين
و لاتسمح باى غلطات او خط وحش و تعد تمسح و تعيد و تزيد
و بعدين عايزاه يعد ما يتنقلش من على المذاكرة الا لما يخلص كل الى وراه مرة واحدة
والطفل ممكن يكون جاى من القاعدة فى الحضانة مرزوع على الكرسى طول النهار و عنده طاقة عايز يفرغها و مش قادر يعد
المهم كل دا طبعا هيخليها تزعق و تبرق و تهزأ و ممكن تضرب و تشتم و تصوت و فيه امهات بتستخدم الشبشب و العصاية و التهديد بعدم التليفزيون و اللعب و الخروج و الحرمان من الحلويات
تفتكرى بعد ما تعملى كوووووول دا
بأى وش تشتكى ان ابنك طالع مش بيحب المذاكرة
يحبها ازاى و هى ارتبطت فى مخه بالصراخ و الضرب و الاهانة و التعذيب
و كل ما ييجى يمسك القلم يفتكر دراكيولا والى هيجراله
لو مش قادرة تتحكمى فى اعصابك و تراعى انه طفل مش مطلوب منه الاتقان الشديد
ولو مش قادرة تخلى وقت المذاكرة وقت محبب ليه
بيسمع فيه كلمات التشجيع و التحفيز و يشوف ضحكتك و صوتك الحنون و نظرتك المحفزة
و مايعدش اكتر من عشر دقايق فقط ويلعب شوية و يرجع تانى
يبقى سيبيه مايعملش الواجب
احسن ما يكره المذاكرة خالص و يفشل فى حياته الدراسية و انت السبب
ليست هناك تعليقات:
إرسال تعليق