مشكلة كبيرة تعانى منها مجتمعاتنا
راجل عايش حياته كما لو انه غير متزوج ...
طول النهار من شغله لأصدقائه للفيس ..و يمكن كمان عامل علاقات نسائية و بيحشش و ...
كل علاقته بمراته و أولاده انه يرميلهم مرتبه كل آخر شهر و خلاص ..
و ييجى ينام و ياكل و يغير هدومه
مشكلة صنعتها الامهات وهى بتربى اولادها
لانه عاش فى بيت والدته أصلا كدة ...بدون ان تحمله اى مسئولية عن البيت الى هو عايش فيه
ولانه شاف والده كان كدة ...و الوالدة هى الى كانت متحملة كل حاجة
وتسألنى الزوجات أعمل ايه ؟
أدامك كذا اختيار
لو حاسة انك بتحبيه و باقية عليه و مش عايزة تخسريه و معاملته ليكى كويسة الى حد كبير
حتى لو فايدته الوحيدة انه بيصرف على ولاده ..استمرى معاه
لان دا غالبا لو اطلقت مش هيصرف كمان على اولاده لانعدام احساسه بالمسئولية
و عيشى حياتك انتى كما تريديها
استغلى فرصة عدم تواجده فى البيت و اشغلى نفسك بانشطة بتحبيها
انشطة رياضية او ثقافية او فنية او تعليمية
اتفسحى و اخرجى مع صديقاتك و قرايبك
لو مش بتشتغلى اشتغلى
او شاركى فى اى انشطة تطوعية
يعنى عيشى حياتك كما لو انك غير متزوجة
و توقفى تماما عن انتظاره وعن التفكير الدائم فى غيابه
لو شغلتى وقتك كويس وقويتى نفسك من جواك مش هتحسى بالاحتياج الدائم ليه
اعتبريه ضيف بييجى البيت له واجبات الضيافة و خلاص
ولو محتاجة مساعدة وفرى من يساعدك حسب امكاناتك
هاتى شغالة ..هاتى مدرس للاولاد
- أما لو منكد عليكى عيشتك كمان و متحكم و مش عايزك تعيشى حياتك كما تريدين و انتى ممكن تصرفى على ولادك من غيره
فدا تطلقى منه
لان دا لامنه و لا كفاية شره
- اما لو مش هتقدرى تصرفى يبقى حاولى تتكيفى و توجدى نشاطات من داخل البيت
اعملى زى المسجون الى بيزوق الزنزانة بتاعته علشان يقدر يستحمل سنوات السجن
اعملى حاجات مبهجة ...
استحمى فى البانيو ..
شغلى موسيقى رقص و ارقصى
اعملى لنفسك كوباية شاى و اعدى فى البلكونة مع موسيقى حلوة
اتعلمى الرسم .التفصيل ..التطريز ..من على اليوتيوب
اعملى علاقات حلوة مع الجيران و اتفسحوا مع بعض فى سطح البيت
اعملى رجيم قاسى و خسى و اهتمى بنفسك و جمالك
اقرئى و اتعلمى و خدى دورات اون لاين و طورى نفسك
ياحبيبتى أوجدى دايما بدائل
ماتعديش حاطة ايدك على خدك زى عبلة كامل الى صورتها بتستفزنى و تدينى صورة للست القليلة الحيلة
ماتنتظريش تكونى سعيدة علشان تعملى الحاجات دى
اعملى الحاجات دى علشان تخفف الضغط عليكى ..
دا مش تعبير عن السعادة ..دا وقاية من الاكتئاب ..علاج للضغط و التوتر
على فكرة
الست لما بتعمل كدة
و تحسس جوزها انها سعيدة و عايشة حياتها حتى لو هو مش معاها
ممكن اوى تجذب جوزها ليها لما يحس انها بطلت نكد و لوم و عتاب و انتقاد ليه
بس ماتعمليش كدة علشان تجذبيه ليكى
اعملى كدة علشان خاطر نفسك اولا
ليست هناك تعليقات:
إرسال تعليق