حتى حب الأم ليس عطاء فقط
الام تعطى حبا و تحصل على الحب من ابنائها
حتى الرضيع الى بيحتاج رعاية ...
لو هو ماكانش بيضحك فى وش مامته
و بيترمى عليها اول ما يشوفها
و يعيط لما تبعد عنه
و يدور عليها لو اختفت من أدامه
تعبيراته دى عن حبه ليها بتخليها تحبه اكتر و اكتر
الحب محتاج شحن من الآخر علشان يستمر ..حتى حب الام
اى أم تحب ابناءها و تشعر بالمسئولية تجاههم
لكن حبها للابن البار الودود الحنون المهذب اكتر من حبها للابن القاسى البذىء العاصى بلاشك
قد تشعر بالمسئولية تجاه الاتنين
لكن حبها لن يكون واحدا للاتنين
لو ابن مش محترم معاها هتلاقيها بتعامله بعنف اكبر
لو مش بيسمع كلامها هتكون اكثر قسوة عليه
لو قاسى معاها هتكون جافة معاه
الحب علاقة لازم تتشحن ..حتى بين الام و ابنها
و لما أولادها بيكبروا و يبعدوا كل واحد فى حياته بتكون منتظرة منهم الكثير
منتظرة حبهم و حنانهم و اهتمامهم و احترامهم
و بتكون محتاجة لكدة اوى
و ممكن تتدخل فى حياتهم بشكل سافر فى محاولة منها لاثبات انهم لازالوا يحبوها و يحترموها
حب الام ..ليس حب من طرف واحد و ليس عطاء من طرف واحد ..بل هو من الطرفين
اى علاقة انسانية علشان تكون ناجحة محتاجة بعض التنازلات و الكثير من العطاء من الطرفين ...حتى الحب بين الام و ابنها
دا حتى الحب بيننا و بين ربنا ..لازم نحبه علشان يحبنا
(إذا تقرب العبد إلي شبراً تقربت إليه ذراعاً، وإذا تقرب إلي ذراعاً تقربت منه باعاً، وإذا أتاني يمشي أتيته هرولة)
ربنا مالك الملك يرزق و يحفظ الجميع حتى الكافر و الملحد
لكنه لايحب الا من أحبه
﴿ فَسَوْفَ يَأْتِي اللَّهُ بِقَوْمٍ يُحِبُّهُمْ وَيُحِبُّونَهُ )
الحب مشاعر متبادلة و المبادلة مهمة كى يعيش و يحيى و يستمر
والحب من طرف واحد لايعيش و لا يكتب له النجاح بل قد يكون عذاب لصاحبه ولا يلبث ان ينتهى و يصبح مجرد ذكرى
لا اقتنع كثيرا بكلمة الحب غير المشروط فى العلاقات الطويلة الأمد زى العلاقة الابوية او العلاقة الزوجية أو علاقات الصداقة
انت ممكن تحب الناس و تعطى من وقتك و جهدك و تتحمل ردود أفعالهم السيئة دون انتظار المقابل فى عمل تطوعى خيرى لطيف
ناس لا تربطك بيهم علاقات وطيدة
تساعد محتاج ..تبتسم فى وش واحد مكشر ..تستمع لواحد متضايق ..تطبطب على واحد تعبان ..تمشى فى حاجة انسان ..تلاطف زميل ...تشارك طعامك مع رفيق سفر ..تسلف احد فلوس
لكن فى العلاقات الانسانية الطويلة الأمد قد تعطى و تحتمل
لكن من الصعب جدا ان يستمر الحب و القدرة على العطاء مع استمرار الأذى و الأنانية من الطرف الآخر
الحب عطاء ..لكن ماينفعش يكون عطاء من طرف واحد فى العلاقات الانسانية ...
بل عطاء متبادل من الطرفين
ليست هناك تعليقات:
إرسال تعليق