قالت : ابنتى فى العاشرة من عمرها لا تؤدى واجباتها
و لا يعنيها حصولهاعلى تقديرات ضعيفة
لازم تحاولى تفهمى الاول سبب الاهمال
هل هو دلع و عدم احساس بالمسئولية و دا بيحصل دايما لآخر العنقود او الطفل الذكر بعد بنات او الطفل المدلع بصفة عامة
و ساعات الطفل الاوسط أو الطفل المُهمَل بهدف لفت الانتباه و الاهتمام
والا يكون ذكاءها بالفعل أقل من أخواتها و مش بتفهم فعلا
فالذكاء الفطرى الدراسى و القدرة على المذاكرة دا فضل من الله يؤتيه من يشاء و مش لازم كل الاطفال يكونوا متفوقين فى الدراسة
و ممكن يكون قلة تركيز و دى بتكون ساعات مشكلة فى الانتباه
حاولى تعدى مع المدرسات بتوعها و تعرفى السبب منهم من وجهة نظرهم
و حاولى تقرى او تسألى عن صعوبات التعلم و تعرفى المشكلة عندها فين بالظبط
احنا بأة نمشى معاها فى عدة اتجاهات :
اتجاه تقبلها ...
يعنى تتقبلى تماما ان دا مستواها و ماتعديش كل شوية تحسسيها انها مهملة و مقصرة و تهدديها وتصرخى فيها وتهزئيها و تحسسيها انها غير محبوبة ...توقفى تماما عن هذا السلوك لان دا هيزود الموضوع و مش هيحله
اعدى معاها و اسمعيها ..اسمعي اسبابها الى بتقولها ..اسمعيها مش علشان تنتقديها ..اسمعيها علشان تحطى ايدك على السبب الى هى بتقوله و نحاول نعالجه مع بعض
اتجاه التشجيع و التحفيز و بث الثقة فى نفسها بالاشادة بأى انجاز تحققه مهما كان لا يرضينا
نحاول نقنع نفسنا اولا ان دى قدراتها و نخليها على الاقل تنجح يعنى لو جابت مثلا 7من عشرة نقولها هايل برافو دا انجاز كويس
بلاش نبص على النتيجة الكلية .
.دورى على الانجازات الصغيرة خلال امتحانات الشهر وضخميها علشان البنت تحس انها ممكن تحقق انجاز و انها مش انسانة فاشلة ...ل
اتقارنيها بأحد و لا بأخواتها
قارنيها بنفسها
يعنى لو جابت فى شهر ٥ و الى بعده ٧ دا انجاز يحترم
ما تعديش تقولى دا اختك جايبة عشرة و دى فلانة صحبتك جايبة ٩
دا اسلوب مؤذى و محبط جدا للطفل
لا تعاقبى أبدا على النتائج و لكن عاقبى على الاهمال فى أداء الواجب و اكدى دايما على النقطة دى ..مهما كان الواجب ممل و صعب ..بس لازم نبذل مجهود
فى حياتنا هتقابلنا كتير عقبات مش هى دى بس .لازم نتعلم اننا نبذل مجهود علشان نتخطاها و نعديها
تحصيل النتائج دى قدرات يختلف فيها الاطفال فلا تعاقبى عليها
قوليلها انا مش عايزة منك درجات انا عايزاك تحسى بالمسئولية تجاه الواجب الى عليكى الواجب مش هيتعمل .
يبقى مفيش كومبيوتر ..
أومفيش تليفزيون ..
أومفيش موبايل
أو مفيش مصروف ...
أو مفيش خروج
و كونى حازمة فى تنفيذ العقوبة مش كلام و بس
شوفى اكتر حاجة هى متعلقة بيها و احرميها منها علشان تحس و يترسخ في ذهنها ان عدم عمل الواجب مرتبط بالحرمان مما نحب
و ان عمل الواجبات غير الانجازات
و اكدى على نقطة مهمة .انا لا اعاقب علشان انت وحشة او اهانة ليكى او انتقاما منك
انا بعاقب علشان اعلمك احد قوانين الدنيا دى ..هتهمل فى عمل الواجب هتتحرم من متع كتير فى حياتك ..هى الدنيا كدة
حاولى تكتشفى برده مهارة او هواية تانية و دخليها فى انشطة رياضية او فنية او اجتماعية أو دينية اديها كورسات تنمية بشرية علشان تحس انها متميزة فى حاجة و ترجع ليها ثقتها فى نفسها
و الاهم من دا كله ان احنا نفسنا يبقى عندنا قناعة ان مش لازم كل الاولاد يكونوا متفوقين دراسيا
بس المهم هو اداء الواجب و تحمل المسئولية
الطفل المهمل فى دراسته دا خطر لانه طفل ممكن يهمل فى اى مسئولية هيتحملها بعد كدة
لكن الطفل الذى يؤدى الواجب و ليس متفوق
دا ممكن نرضى بيه كدة و نبحث عن مناطق اخرى للتميز و التفوق غير الدراسة
ليست هناك تعليقات:
إرسال تعليق