فكرى شوية قبل ما تواجهيه
المواجهة فى المرحلة الاولى غلط
لانك بتكونى منفعلة جدا و بتغلطى و بتطلعى فى الآخر انتى الى غلطانه انك اتجسستى عليه ...و انك مجرمة لانك بتشكى فيه ..وتلاقى نفسك بتعتذرى ازاى ماتعرفيش !!!!!!!
الست العاقلة الراسية ...تفكر و تخطط و ترقد قبل ما تخوض المعركة ..بلاش شغل الثورجية دا
بصى يا حبيبتى خدى فترة كدة اسبوعين ...تلاتة ..شهر تراجعى فيها نفسك ..يمكن تكونى مقصرة معاه ...يمكن اهملتيه شوية عاطفيا ..يمكن اهملتيه شوية جنسيا ...بلاش شغل اهم حاجة معدته دى ...الراجل الى بيلعب بديله بيبقى عنده اهتمامات تانية خالص غير معدته ...
ما تعديش تبررى و تقولى اصل الشغل و العيال و ..و ...و ....
دى مهمة من ضمن المهمات الى اهم العيال
لازم تفهمى كدة كويس
المحافظة على جوزك الى فاتح البيت دا اهم من العيال ....
العيال دول هيتشردوا لو جوزك طفش ....
يبقى لو مكانش علشان خاطره ..يبقى تحافظى عليه علشان خاطر عيالك ياحبيبتى ...
دا ابوهم و هم محتاجينه اكتر ماانت محتاجة ليه ...وزى ماهم محتاجينك بالظبط ....ركزى مع الراجل
بعد شهر مالقيتيش تحسن ..يبقى ننتقل على الخطوة التانية ...لمحى كدة من بعيد لبعيد ..شغل مابال اقوام
دنا النهاردة قريت على الفيس قصة واحدة اكتشفت ان جوزها بيعمل كذا ..حمدت ربنا و بوست ايدى وش وضهر ..ربنا يخليك لى ياحبيبى و يخليلى اخلاصك و حبك يارب
دى صحبتى بتشتكى من كذا و كذا ...الله يكون فى عونها بجد ..انا مش عارفة الرجالة دى ازاى تخون كدة ..
رأيك ايه يا حبى فى الراجل الى بيعمل كدة ...طأطأى ودانك
طب انت تفتكر الراجل الى بيعمل كدة بيعملها ليه ؟...ركزى كويس بأة
طب تفتكر انصحها بايه يا حياتى ؟....ركزى اوى اوى
انا مش عارفة الرجالة مالها ياحياتى ...يعنى هى الست الى على الانترنت دى تفرق عن مراته ايه ؟ ...اسمعى
المهم حاولى تجرجريه كدة فى الكلام ....و تبينى انك بتسجدى سجدة شكر لربنا كل يوم على اخلاصه و حبه
تعدى على كدة فترة طويلة شوية ...و تبطلى تتجسسى عليه و تعرفى هو بيبعد و بينتهى والا لأ
لو حسيتى انه بيحاول يقرب منك و انه بيحاول يتصلح فى علاقته بيكى دى حاجة كويسة
بلاش تعكننى على نفسك بشغل المحقق كونان دا ...حاولى تستمتعى بلحظات السعادة معاه بقدر الامكان و تبعدى عن مخك الشك
اشغلى نفسك دايما بالى انت تعمليه علشان تكسبى حبه .....مش بالى هو بيعمله ...حبيه بجد و تعاملى معاه كطفل شبطان فى لعبة جديدة ...بنسايسه و نهاوده لحد ما يزهق منها
و عليك بالدعاء ربنا يحفظ قلبه و عينيه و حواسه عن الحرام ...
ادعى كتيييير
فالقلوب بين اصبعين من اصابع الرحمن يقلبها كيف يشاء
لو انت اتحسنتى ...و لو هو اتحسن ..يبقى خير و بركة و الحمد لله
مش من الحكمة انك تواجهيه علطول ..لازم تتكلمى بحكمة و عقل علشان تكون كلامك مؤثر اكتر
كلام الهبل و الصراخ و العياط و الانفعال دا بيطلعك فى النهاية انت الى غلطانه
ولا بيأثر فيه
اتكلمنا عن مرحلة ماقبل المواجهة
النهاردة هنواجه بدون مانغلط ..و دا فى أى غلط بيعمله اى انسان معاك ..حتى مع ولادك ..ركزى على مشاعرك انت ..احاسيسك انت ..الاذى الى حصل لك انت ...الالم الى انت حاسة بيه ..ركزى على نفسك انت
يعنى هتقوليها
انا أكتشفت بطريق الصدفة ( ركزى على الصدفة دى ) ..اوعى تقوليله انا كنت بفتش وراك ....او انى كنت بقلب فى الموبايل ..و ما تقوليش الصدفة دى جت ازاى ..مهما طلب منك ..ما تريحهوش ....هى صدفة و خلاص ..علشان ماتطلعيش انت الى غلطانة (وما يقدرش يقول انت غلطانة ) ...و علشان مايعرفش اتكشف ازاى
اكتشفت انك بتكلم واحدة على الموبايل
انك بتكلم بنات على الشات
و لما قرأت حسيت (انا ) بغضب شديد جدا ..و حسيت بالغيرة الرهيبة ..و كنت ببكى بحرقة من غير ما تشوفنى ..كنت مصدومة فعلا
و قلت يمكن الغلط منى انى اهملتك شوية ..و حاولت اصلح نفسى و اتقرب منك و املأ حياتك زى الاول ..
.ركزى على الى انت عملتيه ياحبيبتى ...
حسسيه انك بذلت مجهود علشان لو فيه تقصير منك مايقدرش يقول (انت السبب ) ..اقفلى السكة دى
بس كان رد الفعل الاهمال برده ...احساسى بالاهمال آلمنى اكتر ..انى بحاول أقرب منك و انت مش عايز ...انى بحاول احتويك ..وانت بتصدنى ...انى بحاول اصلح علاقتنا و انت بتبعد
أنا أعرف ان الرجالة أنواع فى الموضوع دا :
فيه رجالة موضوع الستات دا عندهم زى الانفلونزا ....يعنى بتيجى نزلات كدة و تروح
و فيه رجالة عندهم زى المرض المزمن ..يعنى لازم يكون فى حياتهم واحدة تانية ...مايعرفوش يعيشوا من غيرها
و فيه رجالة و العياذ بالله الموضوع دا بيبقى عندهم زى السرطان المنتشر فى اللحم و العظم
أنا ( و ركزى على أنا ) اعتقد ان الحكاية دى من النوع الاول ...نزوة و غلطة و لحظة ضعف و هتعدى ...و انا واثقة فيك انك بتحبنى ..( معلش قوليها كدة من ورا قلبك ..انا عارفة انها صعبة بس لازم تديله الثقة )
وواثقة انك مش عايز تهدم بيتك ( دا تهديد مغلف و لطيف ان العمايل دى ممكن تهدم البيت )
مش عايزة منك اى تبرير او كلام لانى عارفة و مدركة ان اى انسان بيتعرض للحظات ضعف ...و انا واثقة انك هتعديها
بصى حبيبتى
الاسلوب دا بتحققى بيه كذا هدف ..
اولا مش بتغلطى لانك بتتكلمى بمنتهى الاحترام ...وبتخليه يواجه نفسه و يخلى الكورة فى ملعبه و طول ما انت بتتكلمى بحب و احترام طول ما هيتوجع من الى عمله
انا عارفة ان دا الاسلوب المثالى جدا ...الى غالبا محدش بيقدر عليه
بس لو حققتيه بنسبة 50% حتى ...يبقى احسن من انه يقلب الترابيزة كلها عليكى
هتتعاملى معاه كويس جدا
و ياسلام لو وانت بتتكلمى كدة تنزلى دمعتين
دى أول مواجهة ...و بتديله فرصة يتحسن ...علشان تعرفى هى انفلونزا فعلا والا اصيب بمرض مزمن زى الضغط و السكر ..و الا الموضوع وصل للسرطان
و ربنا يديك الصبر و السلوان
ليست هناك تعليقات:
إرسال تعليق