يعانى الكثيرون من الاحساس بالوحدة
وخاصة المغتربين
الاحساس بالوحدة احساس داخلى و ليس له علاقة بوجود الناس أو عدم وجودهم
فيه ناس كتير عايشين فى أسر كبيرة و حاسين بالوحدة
و فيه ناس كتير عايشين لوحدهم و مش حاسين بالوحدة
غالبا بيكون السبب هو انطواء الانسان الشديد و تقوقعه على نفسه
مستنى دايما حد يكلمه
و يشتكى محدش بيسأل عنى ...مع انه قليل مايرفع السماعة و يسأل عن حد
مستنى حد يتكلم معاه ..و عمره مابادر هو بالكلام مع الناس الجداد الى بيقابلهم فى حياته
منتظر حد يقف جنبه فى محنته ..مع انه نادرا ما وقف مع حد فى محنته
منتظر حد يشاركه افراحه مع انه قليلا ما يشارك حد افراحه
و ساعات بيكون اننا مكسوفين نطلب من حد المساعدة فى اوقات الضيق
هل طلبت من حد المساعدة هو رفض ؟
هل رحت لواحد حتى لو غريب عنك بس انت بترتاح له و حاسس انه انسان كويس و طلبت مساعدته ..و بعدين رفض يساعدك
ساعات نكون تعبانين جدا و عايزين الناس تساعدنا من نفسهم ..
طب هم ايش عرفهم اصلا انك محتاج مساعدة ؟
ما تطلب المساعدة
و لو هم رفضوا مساعدتك ...خلاص يبقى لك الكلام
أى انسان كويس مهما كان انشغلاته و حياته ..لو حد طلب منه المساعدة المعنوية بالذات بشكل مباشر هيستجيب
مشاعر الوحدة بسبب سلوكياتك انت و خوفك من الانفتاح على الآخرين
و احساسك الدايم ان الناس بقت وحشة و انك مش واثق فيهم
او انك خايف منهم يؤذوك
و عندك حساسية عالية من أى تصرف يصدر منهم
و خايف تطلب مساعدتهم لايحرجوك
تواصل مع الناس و اسأل عنهم و الى انت محتاجه منهم اعمله معاهم ...و لو احتجت لحد فى اوقات معينة اطلبها منه مباشرة
لو لقيت حد محتاج لك خليك جنبه حتى لو بمجرد الاستماع و التعاطف معاه
كون دايما علاقات جديدة و ماتخافش من التعارف على الناس الجدد فربما تجد فيهم صديقك الصدوق الى ممكن يستمر معاك العمر كله
تعرف على أقرانك من ذوى الاهتمام المشترك ..لو ليك هواية أو اهتمام ما شارك الناس الى عندها نفس الاهتمام و قرب ليهم
ما تحاولش تفتح مع الناس موضوعات انتم مختلفين فيها و ممكن تعمل مشاكل ..دايما اتكلم معاهم فى المشتركات
لا تغلق الباب على نفسك و بعدين تشتكى من الوحدة
كن مع الناس ..قبل ما تطالبهم انهم يكونوا معاك
و لما تجيلك نوبات الاحساس بالوحدة
اتصل بحد ما اتصلتش بيه من زمان
انزل اقعد فى مسجد او كافيه زحمة و اقعد وسط الناس وحول تنكش معاهم فى الكلام
انزل شارك فى اى عمل تطوعى
شارك الناس و خليك وسطهم علشان ماتحسش بالوحدة
المهم ماتقلش أبدا انا مش بيبقى لى نفس اعمل الحاجات دى
انت تنزل تعمل الحاجات دى علشان تعالج احساسك مش علشان لك نفس
جرب
جرب اى فكرة من دول لحد ما تلاقى الحاجة الى تخرجك من هذا الاحساس المقيت
ليست هناك تعليقات:
إرسال تعليق