قالت : كنت عايزه اسألك ...ازاي افتح حوارات مع زوجي
نفسي اتكلم معاه وناخد وندي زي الناس المشكلة مش اني ماعنديش مواضيع بالعكس...
بس هوا بيصدني اوي لو قلت راي مش عاجبه يتريق ويقولي انت ضايعه او تقلب خناقه....
ولو اتكلمت عن مواضيع الستات يقولي ايه الهيافه ديه ...
ولو سالته عن حد يقولي مالناش دعوه بحد...
وماقدرش اكلمه بصراحه شديده عن اني اشتريت كذا او كذا ﻻنه حريص واغلب احتاجاتي عنده مالهاش ﻻزمه...وانا مسرفه في رأيه..
طيب هوا بيحب القصص احكيله حاجه او اساله عن حاجه تعليميه في الادوات واﻻجهزه وكده. ..
المحصله اني بخاف اكلمه ...وبفكر كتير قبل مااطلع الكلمه للاسباب السابقه...وده كله متبيخليش في أريحيه في الكﻻم..
عزيزتى :
للأسف ناس كتير معندهاش ذوق فى الكلام و خاصة الرجالة الى أغلب كلامهم مع بعض سخرية و شتيمة و قلة أدب و بيبقى عايز يتكلم مع مراته بنفس الاسلوب الى اتعود عليه مع صاحبه
فممكن يكون مش قاصدك هو دا اسلوبه مع الكل
حاولى تتكلمى معاه فى اهتماماته بصيغة السؤال ..اسأليه اسئلة و هو يجاوبك عليها
لو بيحب السياسة .بيحب الكورة ..له هواية معينة ..بيحب القصص و الاجهزة زى ما انت بتقولى ...
اسأليه اسئلة فيما يهمة علشان يحس انك مهتمة بأموره و بتسمعيه
واستعمى ليه بمنتهى الاحترام و الادب ...علشان تعلميه ازاى الاستماع المهذب ...اسمعيه الاول و شجعيه على الكلام و الانفتاح عليكى
ثانيا : لما يتريق على رأيك
قوليله بمنتهى الحزم و بمنتهى الاختصار ..من فضلك انا بتضايق من اسلوب السخرية فى كلامك
مش معنى انى مختلفة فى رأيى انى مش بفهم ...
من حقى يكون لى راي مختلف و مش من حقك تهيننى بسبب الاختلاف دا ...
بس و اقفلى ..من غير خناق ..و من غير كلام كتير
لما بتتكلمى كتييير طلبك بيضيع فى نص الكلام ..كونى مختصرة جدا و محددة جدا
مرة و اتنين و تلاتة من غير خناق ...هتلاقيه بيقلل الموضوع دا مع الوقت و بياخد باله
ثالثا : مواضيع الستات اتكلمى فيها مع صديقاتك اغلب الرجالة مش بيستحملوا الكلام فى الموضوعات دى و بيعتبروها هيافة
رابعا : فهميه بالذوق و بالعقل قوليله انا اهتماماتى فى المشتروات غير اهتماماتك
ومش معنى الاختلاف يبقى حاجاتى مالهاش لازمة ..
اطلبى منه مصروف شهرى خاص بيكى تشترى بيه الى انتى عايزاه
الكلام دا على المستوى القريب
على المدى البعيد ثقفى نفسك ..حاولى تقرئى و تكبرى اهتماماتك ..و تنضجى عقلك و طريقة تفكيرك ...علشان نفسك انتى اولا
ليست هناك تعليقات:
إرسال تعليق