أولا : لازم الآباء يكونوا منظمين و نظاف أصلا
و لو الأب مش منظم ولا نظيف يبقى يتقال للاولاد ان دا غلط ...
و ان بابا لم يتعود على كدة من صغره ..علشان كدة انا بعودكم و بعلمكم من صغركم
ثانيا : من وهم صغيرين جدا ...علميهم لما يخلصوا لعب بالحاجة يحطوها فى مكانها تانى
لما يقلعوا الهدوم يعلقوها على الشماعة خلى شماعتهم قصيرة يطولوها
لما يقلعوا الهدوم مش نظيفة يحطوها فى باسكت الغسيل
لما يخلصوا مذاكرة يلموا الكراسات و الكتب و الادوات هم بنفسهم و يحطوها مكانها
ثالثا : بلاش تكونى حامية خليكى صبورة و تنحة
يعنى مش اول ما يوقع حاجة على الارض تجرى انتى تظبطيها
او أول ما يفركش اودته تجرى انتى ترتبيها ...
سيبيه هو يلم الحاجة الى وقعت و ينظف على أد ما يقدر بالتشجيع و التحفيز سيبيه يرتب حجرته الى فركشها بالتشجيع و المدح
و بعدين اعملى انتى باتقان بعديه
الست الحامية الى مش بتطيق وبتعمل بنفسها و بعدين لم يكبروا تشتكى ..
ماهو انتى الى عودتيهم من صغرهم على انك بتعملى
يعنى بالعقل كدة الطفل بيقول لنفسه انظف و انظم ليه طالما فيه حد تانى بيعمل ؟
رابعا: خلى تركيزك الأهم على النظافة الشخصية ..دايما قوليله
لازم ايديك تكون نظيفة
ونغسل وشنا لما نقوم من النوم
و عوديه على غسيل سنانه من صغره ..
و على انه ياخد باله من هدومه و لو اتوسخت يغيرها ..
و على الاستنجاء بعد الحمام ..
و على الاستحمام اليومى
خامسا : بطلى اسلوب النقد و الصراخ و الضرب لانه لن يعطيكى اى نتيجة
بالتحفيز و التشجيع و الحب اطلبى منه مساعدتك
و اشكريه على اى حاجة بيعملها مهما كانت غير متقنه وهايفة و صغيرة
الاتقان دا هييجى بعدين بالتدريب
سادسا : اتكلمى مع ابنك و اغرسى القيمة و المبدأ
احنا بنغسل وشنا علشان النظافة من الجمال و ربنا بيحب الجمال
احنا بنرتب الحجرة علشان تكون الاودة جميلة زى ما شكلنا لازم يكون جميل
احنا مش بنرمى المناديل على الأرض علشان نحافظ على جمال الاودة
احنا بنحط الكوبايات و الاطباق فى المطبخ ..علشان منظر الصالة يبقى جميل
اكدى على مبدأ الجمال ..
و نمى احساسه بالجمال لما يدخل مكان منظم
و احساسه بالقبح لما يشوف مكان غير نظيف و غير منظم
سابعا : بالقصة و الغنوة و الرسم و اللعب و التمثيل و الكارتون ممكن نغرس فى اطفالنا المبدأ
و لما يكبر بالتدريب و التعويد و الاصرار و طولة البال عليه ...هتخليه يتعود
ليست هناك تعليقات:
إرسال تعليق