قال : الزواج التانى ممكن يكون عامل استقرار للزواج الاول
الزوج بيبقى مركز أوى على مناطق النقص عند مراته
و مش طايقها طول ماهى مش بتديله الى هو محتاجه و عايزه
و يوم ما بيحس انه شبع من الجانب الناقص بالزواج الثانى
بيبدأ يحس بالرضا عن مراته الاولى ...
و نظرة الرفض و النفور بتتغير ...و يحس انه بيحبها فعلا ..
و ممكن علاقته بيها تتحسن جدا
قلت : بالفعل شاهدت الكثير مما يؤيد هذا التفسير
و طالما حياته مستقرة
و الاولى و التانية راضيين و سعداء بالوضع دا معنديش اى مشكلة
انا مشكلتى مع الانسان الانانى
لما يدور هو على الاشباع للناقص عنده
و الزوجة الاولى عندها جانب كبير ناقص عندها
المفروض انه يعوض الناقص عند الاولى اولا ...و يؤدى دوره كأب مع اولاده ثانيا ...و يبقى زوج راعى لبيته ثالثا ...
و بعدين يدور على اشباعه الذاتى لو عنده وقت و طاقة و جهد فاضل
مشكلتى مع الانسان الجاحد
الى بيرمى عياله لمراته تربيهم و يهملهم تماما..و يبدأ هو حياته من اول وجديد ..مع العروسة الجديدة ..وفى آخر الشهر يرميلهم الفلوس و كان دا كل دوره معاهم
مشكلتى مع الانسان الندل
الى بيرمى ولاده وحتى مش عايز يصرف عليهم اما عندا واما انتقاما من الام ....كما لو انها ارتكبت جريمة برفضها لزواجه
مشكلتى مع الانسان الرمرام
الى بينقى اى واحدة و السلام ...علشان ينام معاها ..وزواجه بيها ليس بهدف بيت و اسرة ....دا زواج متعة عارف انه مؤقت ..دعارة مقننة ..و لو زهق منها او ماعجبتوش يدور على غيرها
مشكلتى مع الراجل الجبان
الى بيهرب من مسئولية بيته الفاشل بسبب اهماله و جهله و يروح يدور على سعادته هو و نجاحه فى بيت جديد
لو الكل الزوج و الزوجة الاولى و التانية عايشين سعداء و متهنيين و راضيين ...يبقى ربنا يبارك فيه لانه راجل بجد و فاهم
لكن لو هتبنى سعادتك على سعادة اى حد تانى ...يبقى دى انانية بغيضة
الاكرم لك انك تديها حرية القرار بالاستمرار او الطلاق وتتحمل معاها مسئولية الاولاد
و تسيبها تدور على السعادة الى انت ماقدرتش تديهالها مع واحد تانى
ليست هناك تعليقات:
إرسال تعليق